A rôh tơpui tơno, pôa Phạm Minh Chính, Ngế pro xiâm hnê ngăn Chin phuh tối Chin phuh Việt Nam kô pơtối tơrŭm krá rơtế ƀă Chin phuh Singapore mơnhông djâ tơrŭm cheăng pơla péa pâ mơnhông rế tơƀrê, trâu rơdâ, khât tâ, hlối tơƀrê, tơxâng cho môi tơdroăng tơrŭm cheăng rơkê plĕng bĕng beăn tung ASEAN ƀă cho túa ki mâu mơnhông mâu luât pơkâ tơrŭm ƀă khối ki ê.

Ngế pro xiâm hnê ngăn kong têa Singapore tối kô pơtối mơdêk rơdêi tơpui tơno ƀă Khu kăn, trâm mâ mâu kăn xiâm ƀă rêm râ xuân môi tiah luât pơkâ tơrŭm cheăng pơla péa pâ, malối cho rôh trâm mâ tiah hmâ rêm hơnăm pơla Ngế pro xiâm hnê ngăn péa tơnêi têa vâ mơnhông tơrŭm cheăng ƀă loi nhoăm dêi rơpó tơdroăng kal kí.

‘Na mâu tơdroăng tung kơpong, péa pâ vâ môi tuăn mơnhông tơrŭm môi tuăn ASEAN, môi tuăn ƀă Lếo xo pêi hnoăng cheăng châ tơbrê  pro Kăn xiâm hnê ngăn ASEAN 2024, tơmâng tơxâng khât vâ tơdroăng mơnhông tơƀrê tơniăn dêi mâu kơpong, Tung mê, ai kơpong kroăng Mekong, ing mê  ‘no hnoăng veăng gum mơnhông ASEAN rơdêi, hơniâp lĕm ƀă mơnhông tơƀrê, pơtối rak hnoăng cheăng xiâm a kơpong.