Kơxo lơ 8/12, a kơpong tơkăng kong kong pơlê Tây Ninh ƀă kong pơlê Prey Veng (Kong têa Kul), pôa Phạm Minh Chính, Ngế pro xiâm hnê ngăn Chin phuh ƀă pôa Hunmanet, Ngế pro xiâm hnê ngăn kong têa Kul rơtế pơkuâ Leh pơxiâm mơjiâng pro tơpéa tíu tê mơdró ngi lâp plâi tơnêi Tân Nam – Meun Chey. Xông tơpui a roh leh, pôa Phạm Minh Chính, Ngế pro xiâm hnê ngăn tơnêi têa mơnhên tơpéa tíu tê mơdró ngi kong têa ê lâp plâi tơnêi Tân Nam – Meun Chey po ‘’péa tíu tê mơdró ƀă dêi pó’’ nếo, gum thăm tơdjêp cheăng kâ, tê mơdró, ôm hyô ƀă trâm mâ kuăn pơlê pơla péa tơnêi têa.

Tơdrêng amê, pro krá tơdroăng tơrŭm cheăng, tơrŭm ton xŏn. Ngế pro xiâm hnê ngăn tơnêi têa tối rơdêi, Việt Nam ƀă Kul cho péa tơnêi têa ki achê dêi pó, ai tơdjuôm têa kroăng Mekong, tơbêng tơrŭm cheăng ‘’nhŏng achê lĕm tro, nhŏng o tiô khôi vâi krâ nah, tơrŭm tâi tâng, krá tơniăn ton xŏn’’ plâ vâ chê 60 hơnăm hiăng hluâ.

Tíu tê mơdró ngi lâp plâi tơnêi drô tơkăng kong ai hnoăng ki kal tung mơnhông cheăng kâ kơpong. Pêi lo liăn tê mơdró pơla péa pâ mâu hơnăm achê kố rak dâng 10 rơtal dollars/hơnăm ƀă tiô tối hdrối hơnăm 2025 kô châ 12 rơtal dollars.