Kơxêi măng hâi lơ  24/11, a pơlê Túa Lĕm tro - Ôm hyô mâu hdroâng kuăn ngo Việt Nam, pôa Phạm Minh Chính - Ngế pro xiâm hnê ngăn tơnêi têa veăng Leh pơxiâm tơbleăng Măng tĭng “Tơrŭm môi tuăn dêi rơpó mâu hdroâng kuăn ngo - Tơmeăm túa lĕm tro Việt Nam’’ hơnăm 2025 ƀă pơxá “Môi tuăn dêi rơpó -Veăng gum kơpong Tơdế Tơnêi têa’’ hlối krếo khu mơdró, mâu kuăn pơlê veăng ‘no ivá mơno tŏng gum kuăn pơlê kơpong Tơdế Tơnêi têa - Tây Nguyên tơkâ luâ xơpá xua têa lân lu.

Tơdroăng mê pơxiâm ƀă tơdroăng chêh mơnhên rơdâ tối ‘na ki tro lŭp ó xua kong mêi têa lân lu pro. Ngế pro xiâm hnê ngăn tơnêi têa krếo mâu lêng “Veăng tŏng  kum, rơtế tơkâ luâ xơpá”, loi khât  ivá rơdêi ki rŭm môi tuăn tâi tâng hdroâng mơngế kô kum tơnêi têa kâi tơkâ luâ pơloăng mơnúa, pơtối mơnhông rơdêi. A rôh leh, mâu khu pú hên, khu mơdró hiăng tơlo liăn châ 540 rơtal liăn veăng kum kuăn pơlê ki tro tơdjâk xua kong mêi têa lân lu.

-Kơxê lơ 24/11, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa rơtế ƀă kăn pơkuâ Chin phuh ƀă tâi tâng Ƀơrô cheăng Chin phuh veăng tơlo gum kuă pơlê peăng Tơdế Tơnêi têa ki tro tơ’nhiê hngêi trăng, tơmeăm khoăng xua kong mê khía mơhot têa kân lân lu pro ƀă hiâm mơno “tŏng gum mâu ngế ki xơpá”, rêm ngế kăn ƀô̆, kong chưk, viên chưk tơlo iâ hlái cho môi hâi liăn khế.

Ngế pro xiâm hnê ngăn tơnêi têa pơkâ thế mâu kơ koan ki ai tơdjâk troh rĕng pêi pro kơxop mơ-éa pơkâ ‘na hnoăng cheăng ƀă troăng hơlâ ki kal vâ ‘mâi nhông mâu kế tơmeăm khoăng xua kong mêi têa kân lân lu pro, vâ rĕng tơniăn tung rêh ối ƀă ‘mâi mơnhông tơdroăng mơjiâng pro tê mơdró tơmeăm. Rơtế amê, Ngế pro xiâm hnê ngăn tơnêi têa pơkâ thế mơdêk rơdêi mâu troăng hơlâ thăm mơnhông cheăng kâ tro ƀă hbrâ mơdât tơdroăng ki pro mơhrê liăn ngân tung mâu khế ki u ối dêi hơnăm, rak tơniăn tŏng gum kuăn pơlê ƀă rak vế tơniăn tơdroăng cheăng kâ kân.