Klêi kơ’nâi hmâng mâu rơkong tơpui tối, mơgêi rôh hôp, pôa Phạm Minh Chính, Ngế pro xiâm hnê ngăn tơnêi têa tơmâng xo ƀă khĕn kơdeăn tơdroăng ki mơ-eăm dêi kơpong tơdrêng amê hlối mơnhên tối khât ivá veăng kum dêi kơpong tung cheăng kâ rêh ối pơlê pơla dêi lâp tơnêi têa.

Tơdrêng amê Ngế pro xiâm hnê ngăn tơnêi têa xuân mơhno nhên mâu tíu ôh tá tơniăn, xơpá, pơloăng mơnúa tung mê tối nhên, cheăng kâ rêh ối pơlê pơla mơnhông tá hâi tơxâng ƀă ki ai hlâu, ki pơxúa, tíu ối, hnoăng cheăng ki kal dêi Kơpong; mâu kong pơlê mơnhông ôh tá tơ’mô, tơkôm tung hên kơxô̆ liăn ƀă pêi cheăng. Ngế pro xiâm hnê ngăn tơnêi têa pơkâ thế, mơnhông túa pơkâ cheăng kâ rêh ối pơlê pơla kơpong Tơbăng kroăng Hồng athế ai tơdroăng tơrŭm, mơnhông tơƀrê, tŭm têk krá tơniăn, tiah hmâ.