Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên, hơnăm 2024, hơnăm mơnhông tung pêi pro túa pơkâ mơnhông cheăng kâ rêh ối pơlê pơla 5 hơnăm 2021 – 2025, tung mê tơkŭm tung mơdêk ƀă hơ’lêh xúa tơdroăng cheăng kâ kơxô̆; Mơdêk rơdêi tơdroăng hơ’lêh kơxô̆ tơnêi têa; mơnhông Chin phuh kơxô̆, cheăng kâ kơxô̆, pơlê pơla kơxô̆, kuăn pơlê kơxô̆; Tơtrŏng 3 tơdroăng mơnhông tung la ngâ cho mâu ngế cheăng kum ăm hnoăng cheăng hơ’lêh kơxô̆; Hngêi trăng troăng klông, tung mê ai hngêi trăng klông kơxô̆.

Ngế pro xiâm hnê ngăn tơnêi têa tối nhên, hơ’lêh kơxô̆ cho môi hnoăng cheăng ki kal, tơdroăng ki mơnhông tung pêi pro mâu tơdroăng pơkâ mơnhông cheăng kâ rêh ối pơlê pơla. A rôh hôp kố, Ngế pro xiâm hnê ngăn tơnêi têa pơkâ thế mâu kăn tơkŭm tơpui tơno mơnhên tối tơdroăng tơbleăng hnoăng cheăng hơ’lêh kơxô̆ tơnêi têa ƀă ki kal cho mơnhông cheăng kâ kơxô̆, mâu tơdroăng ki pêi pro klêi, ki tá hâi pêi pro klêi, mâu troăng hơlâ ki kal vâ pêi pro hên má môi hnoăng cheăng hiăng châ mơ’no a Túa pơkâ pêi cheăng hơnăm 2024 dêi Vi ƀan Tơnêi têa ‘na hơ’lêh kơxô̆.