Kố cho grup kong ngê̆ thong tin ki xiâm dêi Ấn Độ, ƀă tâi tâng kơxô̆ liăn dâng 70 rơtal dollars, ai lối 320 rơpâu ngế cheăng ƀă kơxô̆ liăn châ xo hơnăm 2023 lối 18 rơtal dollars. Pôa Phạm Minh Chính, Ngế pro xiâm hnê ngăn tơnêi têa tối ‘na tơdroăng ki chôu vế ‘na túa pơkâ, hnoăng cheăng ƀă tíu ối dêi Grup pơkuâ Infosys, xuân môi tiah hnoăng cheăng dêi pôa Narayana Murthy ƀă kơchơ mơdró kong ngê̆ thong tin, phần mềm dêi Ấn Độ mơnhên tối rôh tơpui tơno, tơpui tơno tơƀrê khât dêi pôa Narayana Murthy ƀă mâu kŏng ti, khu ki rơkê ƀă sinh viên Việt Nam.

Tung ivá tơrŭm cheăng tơniăn lĕm ƀă Ấn Độ, Việt Nam phiu ro, hbrâ rơnáu pro tơ’lêi ƀă rơhêng vâ mâu grup pơkuâ ki kân dêi Ấn Độ ‘no liăn tơrŭm cheăng ton xŏn a Việt Nam tung kơvâ cheăng kâ kơxô̆, kong ngê̆ thong tin, kơmăi phần mềm, tuăn ngoâ ki pro, kế ki hrik ‘no hyôh.

­