A roh tơdah, péa Kăn xiâm pơkuâ hnê mơhno phiu ro hlo tơrŭm cheăng Việt Nam – Pơhlăng klêi kơ’nâi 10 hơnăm mơjiâng tơrŭm cheăng ton xŏn 2014 – 2024, rế hía rế mơnhông lĕm ing tơdroăng ‘’khoh chiâng trâm dêi pó’’ ƀă mâu tơdroăng ki tơrŭm tung hên kơvâ, ing tơdroăng mơnhông mơdêk, khôi túa lĕm tro, hngêi trăng, kuăn mơngế troh tơrŭm cheăng ‘na kal kí, cheăng kâ, hnê hriâm, cheăng lêng gâk kring, hbrâ mơdât COVID-19.

Vâ thăm tơrŭm tâ mê nếo, djâ tơrŭm cheăng Việt Nam – Pơhlăng to a râ a’ngêi nếo, prôk trâu hhngế, păng ‘nâng ƀă châ tơƀrê, pôa Phạm Minh Chính, Ngế pro xiâm hnê ngăn tơnêi têa pâ thế péa pâ pơtối tơpui tơno mâu khu râ, ki má lối cho khu râ kăn xiâm, hbrâ lĕm tro ăm mâu roh lăm pôu pêi cheăng Việt Nam la ngiâ dêi pôa Macron, Kăn xiâm pơkuâ kong têa Pơhlăng; xuân môi tiah mơdêk ó rơdêi tơrŭm cheăng pơla mâu khu xiâm, kơvâ cheăng, kong pơlê.