A roh tơpui phôn, pôa Phạm Minh Chính, Ngế pro xiâm hnê ngăn tơnêi têa mơnhên troăng hơlâ môi tuăn păng ‘nâng dêi Việt Nam đi đo nhuô̆m mơnhông mơdêk tơrŭm cheăng tâi tâng ƀă Hà Lan. Péa pâ môi tuăn tơrŭm krá tơniăn mơdêk roh lăm pôu râ Tơnêi têa Việt Nam dêi Pơtáu ƀă jâ pơtáu Hà Lan tung la ngiâ ah; pơtối xúa mâu roh tơ’lêi hlâu dêi pơkâ tê mơdró tơ’lêi hlâu xua Việt Nam – EU (EVFTA), mơ-eăm djâ pêi lo liăn tê mơdró pơla péa pâ châ 15 rơtal dollars tung la ngiâ.

Péa pâ xuân hiăng tơpui tơno ‘na mâu tơdroăng lâp plâi tơnêi ƀă kơpong rơtế rơhêng vâ ‘nâi plĕng. ‘Na tơdroăng têa kơxĭ Biển Đông, péa Ngế pro xiâm hnê ngăn tơnêi têa tối nhên ki kal ‘na rak tơniăn gâk kring, tơniăn lĕm, tơniăn krê pơto tơmeăm drô têa kơxĭ ƀă tơleăng hơniêp lĕm mâu tơxup tơbriât tiô luât lâp plâi tơnêi, ki má lối cho UNCLOS 1982.