Tơdroăng tơkêa kố ai tâi tâng kơlo liăn ‘no vâ chê 20 rơpâu rơtal, ƀă tâi tâng xŏn dâng 3km, tíu tơkoh ƀă troăng Nghi Hàm, tíu tơkoh mơ’nui ƀă troăng Trường Sa. Tơpui a Leh pơxiâm pro, pôa Phạm Minh Chính, Ngế pro xiâm hnê ngăn tơnêi têa tối rơdêi, tơdroăng pơxiâm pro tơdroăng tơkêa ‘no liăn pro troăng Tứ Liên kô veăng gum kơdroh hâ ho a troăng tung kơphô̆ ki xiâm, tơdjêp Tíu xiâm pơlê kong kân Hà Nội ƀă kơpong peăng Kơnhŏng, peăng mâ hâi Lo ‘na kơnhŏng kroăng Hồng, kong pơlê Thái Nguyên, tơdjêp ƀă Tíu xiâm Po kơchơ Mơđah tơbleăng lâp plâi tơnêi ƀă troăng prôk ing tơraih tơƀai Gia Bình vêh tíu xiâm Hà Nội, veăng gum mơnhông cheăng kâ rêh ối dêi pơlê kong kân Hà Nội ƀă kơpong pơlê kong xiâm.

Ngế pro xiâm hnê ngăn tơnêi têa pơkâ thế khu râ Đảng, kăn pơkuâ Vi ƀan pơlê kong kân Hà Nội tơkŭm khŏm mơ-eăm hnê mơhno kơtăng mâu tơdroăng pơkâ thế kih thuât pro, pơkâ dêi luât tơdjâk troh pôi tá mơdêk kơxô̆ liăn, pôi tá pro ăm ai tơdroăng kâ kơluâ, pro mơhrê liăn ngân tơmeăm khoăng tơnêi têa.