Tơbleăng a rôh trâm mâ, pôa Phan Đình Trạc, Ngế cheăng tung khu xiâm kal kí, Kăn xiâm hnê ngăn Đảng, Ngế pơkuâ tung khu kăn xiâm tối tiah kố, mâu tơdroăng hnê tối, pâ thế ƀă tơdroăng kuăn pơlê veăng tối cho tro khât. Mâu kăn Kuô̆k hô̆i kong pơlê Lâm Đồng kô tơmâng xo, tơkŭm tâi tâng klêi mê pơtroh ăm Kuô̆k hô̆i tung rơxông  la ngiâ.

Krê tơdroăng hbrâ mơdât kâ kơluâ, pôa Phan Đình Trạc ăm ‘nâi sap apoăng hơnăm troh nôkố, lâp tơnêi têa hiăng tơleăng, séa ngăn lối 1.800 tơdroăng, ƀă ai 3 rơpâu 493 ngế ai xôi kâ kơluâ ‘na cheăng kâ, ‘na pro kăn, tâk 63,8% kơxô̆ rôh ƀă 44,8% kơxô̆ mơngế ai xôi tâng pơchông ƀă hơnăm nah. Tơdroăng hbrâ mơdât kâ kơluâ dế pơtối tơbleăng pêi kơtăng, ôh tá pơtê, ôh tá ai kơpong ki mơdât ƀă ôh tá ai kơpong ki ê.