Pôa Phan Đình Trạc Ngế cheăng tung Khu xiâm tơnêi têa khê̆n kơdeăn khât tơdroăng tơrŭm cheăng pơla Khu xiâm cheăng ‘na luât péa tơnêi têa tung pơla hdrối nah. Tối nhên, Việt Nam đi đo nhoăng tơdroăng ‘mâi mơnhông tơrŭm pơla Việt Nam - Sinuâ, hbrâ vâ rơtế ƀă peăng Sinuâ potói pêi pro mâu tơdroăng ki kân tâ tung tơrŭm cheăng pơla péa pâ, pêi tro tơdroăng ki hlê plĕng tơdjuôm tơrá mâu kan, mâu tơdroăng tơbleăng tơdjuôm ƀă hlá mơ-éa tơrŭm cheăng hiăng kĭ pơla péa pâ, tung mê ai kơvâ ‘nâ luât.

Pôa Phan Đình Trạc Ngế cheăng tung Khu xiâm tơnêi têa pơkâ thế péa pâ mơdêk tơpui tơno pê klêi hnoăng cheăng tăng ‘nâi plĕng tơpui tơno ƀă mơgêi tung mơjiâng tơnêi têa ƀă hnoăng pêi pro dêi xah hô̆i chuh nghiah, ‘mâi hơ’lêh luât, hbrâ tơplâ mơdât kâ kơluâ, séa ngăn hnoăng pơkuâ , plâ mơdât ki pro pơxúa khu tung mơjiâng Luât, kum ăm tơdroăng cheăng dêi Đảng, péa tơnêi têa.