Pơtối tơdroăng pêi cheăng a kong pơlê Quảng Trị, kơxê lơ 16/10, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơtế khu râ kăn pêi cheăng Khu xiâm hiăng pêi cheăng ƀă Khu pơkuâ hnê ngăn tơdroăng cheăng Đảng kong pơlê Quảng Trị ‘na po rơdâ pêi pro Pơkâ Hneăng hôp Đảng mâu râ ƀă mơnhông cheăng kâ, rêh ối pơlê pơla, rak tơniăn gâk kring tơnêi têa, hmiân lĕm pơlê pơla, mơjiâng Đảng ƀă khu cheăng kal kí.

Xông tơpui a roh pêi cheăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa kheăn kơdeăn Đảng ƀô̆, khu râ kăn pơkuâ kong pơlê Quảng Trị hiăng rŭm môi tuăn, thăm pêi pro pơkâ Hneăng hôp má XIII dêi Đảng, ƀă Pơkâ hneăng hôp Đảng ƀô̆ kong pơlê roh má XVII, hiăng tơbleăng hên pơkâ chuyên đê, mơgêi, pơkâ, mâu tơdroăng pêi, pơkâ pêi pro...

Quảng Trị ai kơlo tơtêk cheăng kâ rĕng tâ kơlo tơdâng dêi lâp tơnêi têa; ivá tơbriât dêi tơdroăng cheăng kâ châ tơƀrê tâ; tơdroăng mơhnhôk mơ’no liăn cheăng, xo hnoăng liăn ngân ƀă tăng cheăng pêi rế hía rế tâk, hngêi trăng, troăng klông rế thăm châ mơ’no liăn tơdâng tơ’mô ƀă tŭm, ki má lối cho troăng klông châ tơdjêp. Khôi túa lĕm tro, hnê hriâm, khăm pơlât châ kong pơlê tơmâng ƀă tơkŭm kơxô̆ liăn mơ’no cheăng, tơdroăng gum rêh ối pơlê pơla, rak ngăn ăm mơngế kơtiê, mơngế ki ôh tá ai ivá tung pơlê pơla châ tơtrŏng; pêi pro lĕm tro tơdroăng cheăng hdroâng mơngế, tơdroăng loi tĭng, tiô khôp, tơrŭm kân hdroâng mơngế.