Kơ’nâi hmâng tối tơbleăng ƀă mâu tơdroăng veăng hnê tối dêi mâu kăn teăng mâ ƀă kuăn pơlê, Kăn xiâm pơkuâ hnê ngăn Đảng tối hâk ro drêng hlo mơngế Việt Nam tơrŭm môi tuăn dêi rơpó, pơtối rak túa lĕm tro, rak tro luât kong têa ki tơná reh ối, tơrŭm ƀă kuăn pơlê Lếo ƀă chiâng kông ki tơdjêp tơrŭm pơla péa hdroâng mơngế péa tơnêi têa.

Tơxâng hâk mơnê tâ, mâu rơpŏng Việt Nam đi đo hvái ngăn pâ dêi pơlê xiâm, tơmâng khât hnê hriâm ăm rơxông ối nếo pơtối rak hriâm nâl Xuăn, tơdroăng hmâ pêi pro ki lĕm ton nah ƀă túa lĕm tro dêi hdroâng mơngế. Klêi mê ối tối, kuăn pơlê pin a kong têa ê đi đo cho môi khu ki tơrŭm krá khât môi tiah môi mơheăm môi hơ’nêh dêi hdroâng mơngế.

Kăn xiâm pơkuâ hnê ngăn Đảng tối nhên, Đảng ƀă Tơnêi têa đi đo pơtối pê klêi luât pơkâ kơjo kum mâu kuăn pơlê ki rêh ối a kong têa ê tung tơdroăng ‘no liăn pêi cheăng kâ, hriâm tâp, tăng ‘nâi plĕng, pơxiâm pêi cheăng, hnê hriâm nâl Xuăn, pơcháu tuăn ngôa rơkê ƀă mơhnhôk pêi pro mâu tơdroăng mơhno túa lĕm tro, tơpui kâ ƀă kuăn pơlê, ing mê mơdêk thăm tơrŭm krá pơla kuăn pơlê pin ki rêh ối a kong têa ê ƀă Tơnêi têa.