Pôa Đỗ Xuân Tuyên, Ngế pro xiâm phŏ Ngế xiâm ngăn pơkeăng ăm’nâi, tơdroăng xoăng pơxá nếo, tơkŭm pro nếo hngêi pơkeăng cho dêi Khu xiâm ngăn pơkeăng tiô troăng kơdroh xiâm ki rak ngăn tơdrêng, tơniăn pêi tro tiô troăng hmâ, troăng rơhlâ dêi Đảng, luât Tơnêi têa, tơtro ƀă pơkâ hdró ‘na hngêi pơkeăng cheăm dêi tơnêi têa  ƀă tơdroăng ki ai khât nôkố.

Mơgêi a rôh hôp, pôa Trần Hồng Hà tối nhên: Tơdroăng xing xoăng ngăn nếo mâu hngêi pơkeăng dêi Khu xiâm ngăn pơkeăng, xuân môi tiah mâu khu xiâm kơvâ cheăng vâ tơkŭm ‘no liăn pro mâu hngêi pơkeăng a râ cheăm ai tŭm ivá pơkeăng tơmeăm khăm pơlât ăm kuăn pơlê. Pôa Trần Hồng Hà pơkâ thế Khu xiâm ngăn pơkeăng séa ngăn tối nếo tơdroăng xoăng ngăn, tơkŭm pro nếo mâu hngêi pơkeăng dêi râ xiâm tiô pơkâ ai nôkố; hlối tơmâng ‘no liăn ‘mâi rơnêu, rôe pơkeăng, tơmeăm khăm pơlât,  tŭm tâ, pro a mâu tíu ki pơkâ, kơpong hngế hơngo ki hâi tơxâng tiô pơkâ dêi hngêi pơkeăng.