Tơpui a Rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên: Rôh hôp Cheăng kâ rơnó khía hngíu hơnăm 2025 ôh ti xê cho môi tơdroăng ki kong têa ê ki kal, mê ối cho tơdroăng ki po ăm môi hneăng ki nếo ai hên tơdroăng púi rơhêng vâ tung rôh tơrŭm cheăng mơnhông ƀă tơrŭm cheăng ƀă kong têa ê dêi Việt Nam; xua hơniâp lĕm, tơniăn, tơrŭm ƀă mơnhông tung kơpong ƀă lâp plâi tơnêi.

Ngế pro xiâm hnê ngăn tơnêi têa tối nhên, Rôh hôp Cheăng kâ rơnó khía hngíu hơnăm 2025 cho tơdroăng ki kal mơhno nhên tuăn ngoâ tơkŭm, troăng ngăn veăng gum ƀă pêi pro tơdjâk dêi Việt Nam rơtế ƀă mâu kong têa tung lâp plâi tơnêi. Ngế pro xiâm hnê ngăn tơnêi têa tơmâng xo mâu rơkong tơpui tối, tơchĕng tơmiât ƀă tơhrâ châ tơdroăng ki veăng gum a Rôh hôp Cheăng kâ rơnó khía hngíu  hơnăm 2025 kô pơtối tơdjâk ƀă châ pêi pro pơhlêh ƀă mâu tơdroăng pêi ai pơxúa - mơnhông pơxiâm ăm mâu tơdroăng tơngah tơrŭm cheăng nếo ƀă mâu tơdroăng pêi pro nhên vâ rơtế mơjiâng pro tơdroăng tung la ngiâ mơnhông tơ’lêi hlâu, kơxô̆ ƀă rơkê ăm tâi tâng kuăn mơngế.