Hơnăm kố, 100 ngế tê mơdró hơnăm ối nếo kơhnâ rơkê châ pơ-ôu, pơ-eăng, tung mê 10 ngế ki kơhnâ rơkê châ tơdah Pri mơhá Hơlŏng Khêi - inâi mơnhên pơhlêh nếo tơmiât pêi rơkê, mơdêk ivá pơkuâ ƀă veăng gum pơlê pơla. Ki rơhêng vâ tối Hô̆i đong tơdjuôm rah xo hiăng môi tuăn pơkâ Khu xiâm Khu pơkuâ Droh rơtăm Việt Nam séa ngăn diâp inâi Hơlŏng Khêi kơnâ hơnăm 2025 ăm 1 ngế tê mơdró mơhno tơdroăng ki mơ-eăm, tơkâ pá puât vâ mơ-eăm tung tơdroăng rêh ối, ai tơdroăng cheăng kâ châ tơƀrê ƀă mâu tơdroăng veăng gum ăm pơlê pơla.

Mâu khu tê mơdró ối tung TOP 100 ai tơmeăm khoăng vâ chê 3 rơtuh rơtal, pêi lo châ lối 310 rơpâu rơtal liăn, nâp liăn hnôu liăn tơnêi têa vâ chê 21 rơpâu rơtal liăn ƀă tăng cheăng pêi ăm vâ chê 60.000 ngế pêi cheăng. Mâu kơxô̆ kố pơtối mơnhên hnoăng djâ troăng ahdrối dêi khu ngế tê mơdró ối nếo tung hên kơvâ ki xiâm môi tiah kơmăi kơmok, liăn ngân – hngêi arak liăn, on tơhrik ki vêh bro, logistics, kŏng ngê̆, hnê hriâm, xúa kế tơmeăm ƀă tơmeăm tơnêi, hngêi trăng krúa lĕm.