*Rôh kong mêi têa kân lân lu sap nah hâi chói ai kố hiăng pro 3 to cheăm, bêng dêi kong pơlê Dak Lak, tung mê tro lŭp hên má môi cho mâu cheăm Đông Hòa, Hòa Xuân, Hòa Thịnh, Hòa Mỹ… Drêng têa hiăng xiâ, kuăn pơlê ƀă khu ki ai tơdjâk troh cho mố đô̆i, kŏng an, đoân theh cheăm hiăng veăng gum mơgrúa lĕm, kui tah mâu tơnêi, xôh pơkeăng, gô̆m văng mâu xok, ‘mâi mơnhông tơdroăng rêh ối, vâ rĕng tơniăn.

Riân ngăn nếo achê kố dêi Vi ƀan hnê ngăn kong pơlê ăm ‘nâi, lâp kong pơlê ai 55 ngế hlâ, 10 ngế hía, lối 150 rơpâu toăng hngêi tro têa lu, lối 120 toăng tro tơhnâp lơ tơ’nhiê tâi tâng; tâi tâng ki tro lŭp tiô riân lối 5.500 rơtal liăn. Pôa Lương Nguyễn Minh Triết, kăn pơkuâ ngăn Đảng tối nhên, têa hiăng xiâ tâi a kơpong peăng mâ hâi Lo, khu pơkuâ ngăn Đảng pơkâ thế mâu khu ki ai tơdjâk rĕng tŏng gum kuăn pơlê, tơrŭm xing xoăng tơdroăng tŏng gum tơmeăm, tơdrêng amê hlối mơgrúa lĕm kong prâi tơnêi tơníu, malối cho hngêi trung hriâm, hngêi pơkeăng cheăm vâ rĕng pêi cheăng gum kuăn pơlê.

*Kơxê hâi lơ 23/11, a Kơno tuk Qui Nhơn, ai chât ngế kăn ƀô̆, mâu lêng tuk dêi Mố đô̆i tơkăng kong 2 ƀă Đông tơkăng kong tíu tê mơdró a kơpong tíu tơkăng kong Quy Nhơn thâ rĕng xo 120 tâ̆n phái xua Khu xiâm ‘măn rak phái tơnêi têa tŏng kum ăm kuăn pơlê Gia Lai ki tro tơdjâk xua têa lân lu. Tơdrêng mê há, a cheăm Ngô Mây ƀă Cát Khánh, 20 ngế kăn ƀô̆, mâu lêng Đông tơkăng kăng Cát Khánh tơrŭm ƀă mâu kăn cheăm kong pơlê chơ, xoăng ăm 15 toăng rơxế chơ mâu tơmeăm pơtroh ăm mâu thôn Chánh Hữu, Chánh Định, Chánh Hội  ƀă  Vân Trim,  tơniăn  teăm tơdrêng, tro mơngế.

Tung rôh kong mêi hdrối kố nah, rơpâu ngế kăn ƀô̆, mâu lêng dêi Kuân khu 5, Kuân đoân 34 ƀă Khu xiâm pơkuâ ngăn lêng kong pơlê Gia Lai hiăng mơhnhôk hên mâu ngế, rơxế tơrŭm ƀă kŏng an, mâu kăn cheăm tơkŭm tŏng km mâu ki xía vâ, djâ hrĭng rơpâu ngế lo ing kơpong rơ-iô, tŏng kum chât rơpâu ngế tung pơla kong mêi têa lân lu rơ-iô.

*Kong măng lơ 23/11, khu ki ai tơdjâk troh cheăm D’Ran, kong pơlê Lâm Đồng pơtối gum kuăn djiân dêi kế tơmeăm troh tíu tơniăn, tơdrêng amê hlối pơto cho tơmeăm lo ing kơpong ki mơni kô tơ’lêi tro tơhnah. Hdrối mê, cho a 15 chôu rơtế tung hâi, kăn pơkuâ cheăm D’Ran hlo a ngon Ba Lá Xanh, thôn Lạc Thiện 2 tơnêi rơheăng xŏn lối 300m, rơdâ 20-50cm, ai tíu ki ‘nâi tơhnâp vâ chê 1m dro ngo, mơni kô tơhnah tơhnâp kân.

Rơtế amê, tíu ki tât peăng pa rŏng péa kơpong tơnêi kuăn pơlê pơtối tro tơhnah, pro lối chât khô̆i tơnêi hmốu klêh a kơpong kuăn pơlê rêh ối. Drêng tâng tơdroăng, kăn pơkuâ mơhnhôk lối chât rơpŏng kuăn pơlê peăng pá xôp ngo xĕn lo tơdrêng, xoăng tíu ối pơtân. Khu ki ai tơdjâk kŏng an, đoân theh cheăm châ pơtroh troh tŏng gum kuăn pơlê djiân dêi tơmeăm, rơxế vâ kơdroh iâ ki lŭp ƀă rak tơbiăn châ chăn ăm kuăn pơlê.