Ing apoăng hơnăm troh nôkố, kong mê khía mơhot têa kân lân lu hiăng pro 14 ngế hlâ, hía ƀă tơ’nhiê hên kế tơmeăm tiô riân vâ chê 400 rơtal liăn. Ai mâu rôh kong mê khía mơhot ki ó hiăng trâm tung lâp tơnêi têa. Hngíu ‘mêi, hngíu ó a kơpong Bắc Bộ; kong tô mơdrăng khăng khoăng, têa xăng po lân mot, tơhnah tơnêi ƀă têa lân lu xua têa kơxĭ tâk đik a tơbăng kroăng Cửu Long, Tây Nguyên; kong mêi kân, khía jâ kơdo, kong mê príu pơtối tung lâp lu a 19 to kong pơlê Bắc Bộ ƀă Bắc Trung Bộ.

Tơpui mơgêi rôh hôp, pôa Trần Lưu Quang, Ngế pro xiâm phŏ hnê ngăn tơnêi têa tối nhên hnoăng cheăng hbrâ ví khía mơhot têa kân lân lu ối 6 tơdroăng ki ối. Tung mê, ai tá hâi hlê plĕng dêi kuăn pơlê ƀă kơvâ cheăng ki ai tơdjâk troh; hnoăng cheăng séa ngăn, pơkâ hdrối rơnó ê khía mơhot ai tíu ki tá hâi pêi tro.

Ngế pro xiâm phŏ hnê ngăn tơnêi têa pơkâ thế mâu kơvâ cheăng, ki ai tơdjâk troh ƀă kong pơlê hbrâ rơnáu ‘mâi mơnhông mâu tơdroăng ki u ối trâm kố.