Pơtối mê, pôa Trần Hồng Hà, Ngế pro xiâm phŏ hnê tơnêi têa pơcháu Khu xiâm pơkuâ troăng prôk ƀă rơxế kơtâu – Rơxế pơto tơmeăm, mơngế pơkuâ, tơrŭm ƀă Khu xiâm pơkâ túa cheăng ƀă Mơ’no liăn cheăng ƀă mâu kơ koan ki tơdjâk séa ngăn pâ thế dêi Vi ƀan kong pơlê Khánh Hòa, Vi ƀan kong pơlê Lâm Đồng, tơbleăng Ngế pro xiâm hnê ngăn Chin phuh hdrối hâi lơ 30/10/2024.

Khu râ kăn pơkuâ 2 kong pơlê môi tuăn pâ thế dêi ngế ối a ko Chin phuh pơcháu Vi ƀan kong pơlê Khánh Hòa pro kơ koan ai hnoăng Tơdroăng tơkêa bro PPP mơ’no liăn mơjiâng pro troăng kân ăm phêp rơxế kơtâu têi Nha Trang – Đà Lạt. Tâi tâng ki xŏn troăng kân ối tung Tơdroăng tơkêa bro lối 80 km, tung mê, ai kơpong prôk tơkâ hluâ kong pơlê Khánh Hòa dâng 44km, kơpong tơkâ hluâ kong pơlê Lâm Đồng dâng 36,8 km.

Tơdroăng tơkêa bro ai apoăng tâi tâng kơxô̆ liăn mơ’no dâng 25.000 rơtal liăn. Hâi khế pêi pro tơdroăng tơkêa bro cho sap ing hơnăm 2024 troh hơnăm 2028. Tơdroăng tơkêa bro troăng kân ăm phêp rơxế kơtâu têi tơdjêp 2 tíu xiâm ôm hyô kân Nha Trang – Đà Lạt mơjiâng kô mơdêk tơdjêp kơpong, mơnhông cheăng kâ, tơdjêp tơniăn tơdroăng gâk kring, gâk kring tơnêi têa.