Kong mêi têa lu pro tơ’nhiê kơpêng 5 to troăng kân, văng Prenn, 3 troăng kân dêi kong pơlê ƀă hên troăng kân tung kong pơlê Lâm Đồng, ƀă kơxô̆ liăn ‘no vâ ‘mâi rơnêu riân châ 361 rơtal liăn. A văng Mimosa, Khu Rak ngăn tơdroăng tơkêa bro 85 dế po troăng pơtân, tiô tối hdrối kô pê klêi a hâi lơ 29.11/2025; troăng hơlâ pro kông a tơnêi ki rơdâ 9m hiăng châ kĭ ƀă ăm pro a hâi lơ 10/12, tiô tơdroăng tơkêa kô bro tung 3 troh 4 khế.

A văng Dran, tíu tơnêi tơhnah kơđu troăng dế châ gum tơkŭm tơnêi, văng troăng, mơ-eăm pê klêi hdrối hâi lơ 10/12 la ngiâ; văng Gia Bắc hiăng châ pro troăng. A rôh hôp, pôa Nguyễn Hồng Hải, Phŏ kăn hnê ngăn Vi ƀan kuăn pơlê dêi kong pơlê Lâm Đồng tối tơdroăng cheăng rak ngăn mâu troăng prôk ki xiâm tung pơla hdrối kô nah, malối cho troăng văng Prenn, hơlâ ki xiâm vâ mot lo a Đà Lạt.

Pôa thế Khu xiâm mơjiâng tơmeăm khoăng ƀă Khu rak ngăn troăng dêi kong pơlê tơdah xo, ‘mâi rơnêu ăm kêi hdrối Têt Lo hơnăm nếo, vâ tơniăn ai troăng prôk lăm a mơ’nui hơnăm.