Khu kăn tíu xiâm  Đảng Kŏng sản Viật Nam, Kuô̆k hô̆i tơnêi têa Kŏng hoà xah hô̆i chuh nghiah Việt Nam, Kăn xiâm hnê ngăn tơnêi têa Kŏng hoa xah hô̆i chuh nghiah Việt Nam, Chin phuh tơnêi têa Kŏng hoa xah hô̆i chuh nghiah Việt Nam, Vi ƀan Măt trâ̆n Tơnêi têa Việt Nam ƀă rơpŏng hngêi mơjo pâ  tơbleă tối: Pôa Trần Đức Lương, Ngế cheăng tung khu xiâm Kal kí, Kăn xiâm hnê ngăn Tơnêi têa Kŏng hoa xah hô̆i chuh nghiah Việt Nam hneăng hdrối, Kăn hnê ngăn Hô̆i đong ‘na Lêng ƀă Kring tơniăn, kot mâ hâi lơ 5/5/1937; pơlê xiâm:  cheăm Phổ Khánh,  tơring  Đức Phổ (nôkố cho pơlê kong krâm Đức Phổ), kong pơlê Quảng Ngãi; ối a kơxô̆ hngêi 298, phô̆ Vạn Phúc, bêng Liễu Giai, pơlê krâm Ba Đình, Pơlê kong kân Hà Nội.

Pôa veăng cheăng kăch măng sap khế 2/1955; mot Đảng Kŏng sản Việt Nam hâi lơ 19/12/1059; Ngế cheăng tung Khu xiâm Đảng hneăng 5, 6,7,8,9; Ngế cheăng tung khu xiâm kal kí hneăng 8, 9 ; Ngế cheăng tung Khu xiâm Kal kí hneăng 8; Phŏ Kăn hnê ngăn Hô̆i đong Ngế xiâm sap khế 2/1992 troh khế 8/1997; Kăn xiâm hnê ngăn Tơnêi têa Kŏng hoa xah hô̆i chuh nghiah Việt Nam, Kăn xiâm hnê ngăn Hô̆i đong Lêng ƀă Kring tơniăn, hneăng 10, hneăng 11; Kăn hnê ngăn Kuô̆k hô̆i mâu hneăng 7, 8, 10, 11.

Klêi kơ’nâi châi ta mo râ, mơhé hiăng châ Đảng , tơnêi têa , khu mâu yăo sư, ƀok thái pơkeăng pơlât ngăn nhên khât, rơpŏng hngêi hiăng mơ-eăm rak ngăn, la xua hơnăm hiăng hên, châi tamo râ, pôa hiăng  kơtê hiâm, a 22 chôu 51 phut, hâi lơ 20/5/2025 (tơkéa vâ tối hâi lơ 23/4 hơnăm Ất Tỵ), a hngêi tơná pôa, pơ’lăng 88 hơnăm.

Tung lối 50 hơnăm pêi cheăng kăch măng, pôa hiăng ai hên hnoăng veăng ‘no hên hĭn ƀă tơdroăng cheăng kăch măng dêi Đảng ƀă hdroâng mơngế. Pôa châ Đảng, Tơnêi têa diâp Huân chương Hơlŏng trĭng, Huy hiệu 65 hơnăm cheăng Đảng ƀă hên huân chương, huy chương, hnoăng mơhá, inâi pơxá ki kơnía hit ki ê. Pôa hlâ cho môi tơdroăng ki lup kân ƀă Đảng, Tơnêi têa, Kuăn pơlê pin ƀă mâu hdro o hdrông hdrê pôa.

Vâ mơhno hiâm mơno pâ pơjo  kơ pôa Trần Đức Lương , Khu kăn xiâm Đảng kŏng sản Việt Nam, Kuô̆k hô̆i tơnêi têa Kŏng hoa xah hô̆i chuh nghiah Việt Nam, Kăn xiâm hnê ngăn tơnêi têa Kŏng hoa xah hô̆i chuh nghiah Việt Nam, Chin phuh tơnêi têa Kŏng hoa xah hô̆i chuh nghiah Việt Nam, Vi ƀan Tíu xiâm Măt trâ̆n Tơnêi têa Viẹt Nam pơkâ tơkŭm po mơdâk kiâ pôa tiô Râ kân tơnêi têa.