Hơnăm 2018, Y Vui Ayun pâ veăng cheăng tung khu lêng kring vế kuăn pơlê cheăm Ea Kao, pơlê kong kơdrâm Ƀuôn Ma Thuột. Lối 6 hơnăm pêi cheăng ƀă khu kố, ngoh đi đo pơtối rak vế pêi pro tơdroăng ‘nâi mơ-eăm tơkâ luâ tơdroăng xơpá, kơhnâ veăng pêi mâu tơdroăng hriâm cheăng, hbrâ vâ tơplâ, pêi tro tơdroăng hnê mơhnhôk, rak tơniăn tung kring gak ngăn pơlê cheăm, hbrâ ví xía vâ kong prâi ôh tá tơniăn.

Malối, tung mâu rôh tâ tú pơreăng COVID - 19 a hơnăm 2020 ƀă 2021, ngoh pâ lăm a kơpong ai tâ pơreăng vâ kum mâu ngế cheăng plâ mơdât pơreăng. Tơdrêng amê, ngoh xuân kơhnâ pêi chiâk deăng mơnhông cheăng kâ ăm dêi rơpŏng hngêi. Ƀă 1 ha kơphế pêt tơvât ƀă loăng plâi sầu riêng, nôkố hơnăm ki lâi kơdrum loăng xuân ai plâi tê châ 300 rơtuh liăn. Ngoh tối, kơnôm pêi klêi tơdroăng pơcháu ƀă pêi cheăng kâ, hơnăm 2022, ngoh cho môi tung hên ngế kuăn pơlê ki kơhnâ pêi cheăng châ chi ƀô̆ ƀuôn Huê, cheăm Ea Kao mơhno tơbleăng ăm lăm hriâm lâm hnê tối ‘na Đảng ƀă klêi hriâm kơ’nâi mê môi hơnăm châ ăm mot Đảng. Đảng viên Y Vui tối:

“Drêng châ mot Đảng, a hâk phiu, mơdrốu dêi tơdroăng ki mơ-eăm tơná. A đi đo mơ-eăm pê klêi tŭm tơdroăng pơcháu  ƀă djâ troăng ahdrối  tung pêi cheăng kâ mơnhông tơdroăng cheăng kâ ăm dêi rơpŏng hngêi kơdroh kơklêa xăm kơtiê. Drêng hiăng cho môi ngế đảng viên khât, mê á pơtối mơ-eăm nếo, hriâm rơnêu pât hiâm mơno, mơ-eăm pê klêi hnoăng cheăng hiăng pơcháu’’.

Tung hơnăm 2023, riân to Khu pơkuâ ngăn lêng cheăm Ea Kao, hiăng ai 3 khu lêng kring vế kuăn pơlê châ mot Đảng. Tâi tâng xuân to mâu ngế pêi cheăng kơhnâ, ‘nâi mơ-eăm tung pêi cheăng, kơhnâ hriâm rơnêu pât tơná, veăng hriâm tâp châ tơƀrê tung mâu rôh veăng hriâm mơnhông cheăng kâ dêi rơpŏng hngêi. Cho môi tung 3 ngế pêi cheăng kơhnâ rơkê dêi khu pơkuâ ngăn lêng cheăm Ea Kao châ mot Đảng hơnăm 2023, đảng viên Nguyễn Thanh Tùng hâk tơngăm tối:

 “Ƀă hnoăng cheăng tơná cho môi ngế đảng viên, a thế pêi tro hnoăng cheăng ki pơcháu ăm tơná pêi tá a kơ koan xuân môi tiah a hngêi. A thế rak vế pêi pro tro chôu pơkâ dêi khu lêng kring vế kuăn pơlê, hriâm tâp tơná vâ kơhnâ khên tơnôu tung tơplâ, pê klêi mâu tơdroăng cheăng dêi Chi ƀô̆, Khu pơkuâ ngăn lêng cheăm ai pơcháu, veăng kring vế tơniăn tung cheăm, thôn pơlê ’’.

Cheăm Ea Kao ai 14 to thôn, lối 20 rơpâu pơ’leăng mâ mơngế, tung mê ai dâng 45% cho kuăn ngo. Đảng ƀô̆ ai vâ chê 350 ngế đảng viên, rêh ối a 23 to chi ƀô̆ đảng a pơlê cheăm. Pôa Y Mnông Hđơk - kăn hnê ngăn Đảng uỷ ăm ‘nâi, pêi pro tơdroăng mơnhông cheăng Đảng, malối cho tung  khu lêng kring vế kuăn pơlê, mâu Chi ủy, Chi ƀô̆ Đảng cheăm veăng tăng ‘nâi mâu tơdroăng ăm Đảng ủy cheăm hnê mơhno, xing xoăng tơdroăng cheăng ăm đảng viên séa ngăn veăng kum hnê thế mơ-eăm, hriâm tâp,  mơhno mơngế ki pêi cheăng kơhnâ veăng hriâm mâu lâm va hlê ‘na Đảng ƀă klêi mê séa ngăn vâ tơ’mot ăm mot Đảng. Pôa Y Mnông tối:

 “Hơnăm 2024 ngin hiăng ’mot 2 ngế mot đảng viên cho mâu ngế tung khu lêng kring vế kuăn pơlê. Nôkố a Khu pơkuâ ngăn cheăng cheăm, hiăng hnê 2 ngế ki kơhnâ rơkê chêh lý lịch đảng vâ séa ngăn, ƀă kôm troh sap khế tơpah troh khế tơchên ah kô ’mot ăm prếi’’.

Pơlê kong kơdrâm Ƀuôn Ma Thuột ai 13 to bêng ƀă 8 to cheăm, ƀă vâ chê 400 rơpâu pơ’leăng mâ mơngế, tung mê ai 1.900 ngế cho khu lêng kring vế kuăn pơlê, kơxô̆ đảng viên châ 25%. Tiô Thươ̆ng tă Mai Văn Khuê, kăn phŏ hnê ngăn Đảng lêng pơlê kong kơdrâm Ƀuôn Ma Thuột - Chính trị viên Khu pơkuâ ngăn lêng pơlê kong kơdrâm tối, vâ mơjiâng, vâ mơnhông khu lêng kring vế kuăn pơlê ƀă mơdêk ivá pêi cheăng hbrâ tơplâ mê tơdroăng rah xo mơngế vâ hriâm ăm mot đảng viên tung khu lêng kring vế kuăn pơlê  kố đi đo châ Khu kăn pơkuâ hnê ngăn Đảng pơlê kong kơdrâm ƀă rêm râ ủy đảng cheăm tơring thế tơmâng tơbleăng pêi tro mâu tơdroăng.

Thươ̆ng tă Mai Văn Khuê ăm ‘nâi, vâ mơdêk kơxô̆ đảng viên tung khu lêng kring vế kuăn pơlê, Đảng ủy, Khu pơkuâ ngăn lêng pơlê kong kơdrâm hiăng hbrâ tí tăng ăm khu kăn Đảng pơlê kong kơdrâm pơkâ mâu hnoăng pêi pro ‘na mơdêk pơkuâ ngăn tơdroăng cheăng pêi, khu lêng kong pơlê; ‘nâi nhên pơkâ, kơxô̆ mơngế mot đảng viên tung khu lêng kố tiô pơkâ. 

“Ngin tơrŭm ƀă Khu tơkŭm po dêi Đảng pơlê kong kơdrâm pơcháu kơxô̆ ăm Đảng ủy mâu cheăm, bêng, rêm hơnăm rêm cheăm tơring ai pơkâ kơxô̆ mơngế vâ ’mot ăm mot đảng ing 2 ngế đảng viên tơngi klêng. La ki khât nôkố, hên tíu pêi cheăng hiăng tơ’mot ai 3 ngế thăm nếo 4 ngế đảng viên”.

Ƀă tơdroăng tơmâng hnê mơhno ƀă ’mot mơngế chiâng đảng viên tung khu lêng kring vế kuăn pơlê a pơlê kong kơdrâm Ƀuôn Ma Thuột, khu kăn ƀô̆ a pơlê cheăm đi đo châ hnê mơhno tro, ai tơmiât troh tơdroăng pơtối rak vế pêi pro. Ivá pơkuâ hnê mơhno, ivá tơplâ dêi chi ủy, chi ƀô̆ ƀă mâu ngế đảng viên tung khu lêng kuăn pơlê hiăng ôh tá la lâi pơtê mơdêk tơƀrê, veăng pêi tro tơdroăng cheăng lêng kring tơniăn, rak  tơniăn a pơlê cheăm.