Pá kơdâm loăng pakĭng troăng kân tơnêi têa 14, a ngiâ bo cheăng hngêi trung Trung hok phôh thong Quang Trung, cheăm Dak Rla, tơring Dak Mil, kong pơlê Dak Nông, mâu kŏng an dế séa ngăn tơdroăng prôk troăng tiô luât tơniăn troăng klông ƀă mâu hok tro vê rơxế honđa. A kố, rơtế ƀă tơdroăng séa ngăn, kŏng an xuân hnê mơhno, pơchân tối mâu vâi o to rơxế tiô luât troăng klông. O Nguyễn Anh Trung, hok tro lâm 12A6 tối:

“Mâu tăm kŏng an đi đo séa ngăn vâ ví mâu tơdroăng xôi luât mê cho lĕm tro. Mâu tăm séa ngăn rơxế, châ hlo ƀă pơxâu phâk teăm tơdrêng mâu tơdroăng pro xôi’’.

Ahdrối drêng séa ngăn, khu kŏng an hiăng troh Hngêi trung râ má pái phôh thong Quang Trung tơkŭm po pơtâng tối, xing xoăng mơ-éa pơtâng tối ‘na mâu pơkâ dêi luât ‘na rak tơniăn troăng klông. Kŏng an xuân tơrŭm ƀă hngêi trung séa ngăn, ngăn i nhên a mâu hngêi rak rơxế dêi hngêi trung ƀă mâu tíu rak rơxế rơtâ tá hngêi trung, pơtâng tối, pơchân tối hok tro ôh tá xúa rơxế hon đa yung tích xi-lanh lối 50cm3 drêng tá hâi tro hơnăm tiô pơkâ. Klêi kơ’nâi kĭ tơkêa to rơxế tro tiô luât Rak tơniăn troăng klông, o Trần Thị Thu Thanh, lâm 12A1, tối ăm ‘nâi:

“Á muăn tâ cho kal khât ƀă kơnâ khât drêng kum ngin muăn tơ’nôm hên tơdroăng ‘na pơkâ tơniăn troăng klông; ƀă ing mê, mê nếo hbrâ mâu tơdroăng ki ôh tá tro tơ’lêi trâm drêng kơto rơxế drô troăng kân’’.

Thái Nguyễn Văn Ngọc, Kăn pơkuâ Hngêi trung Trung hok phôh thong Quang Trung tối ăm ‘nâi, hngêi trung a troăng kân tơnêi têa 14, tíu ai kơxô̆ rơxế prôk lăm hên tơ’lêi trâm tơdroăng tơklâm rơxế drêng kơto rơxế lo a troăng kân. Hngêi trung tơrŭm ƀă mâu khu cheăng đi đo pơtâng tối vâ hok tro hlê plĕng pêi tiô kơtăng mâu pơkâ drêng kơto rơxế drô troăng kân:

“Má môi cho hngêi trung hiăng ăm mâu vâi o kĭ tơkêa, má péa cho đi đo séa ngăn tơdroăng pêi pro tiô tro pơkâ; ƀă xuân đi đo pơchân tối mâu vâi o tung mâu roh sinh hoăt rêm măng tĭng. Rêm hơnăm mê hngêi trung tơrŭm ƀă kơvâ kŏng an tơkŭm po tơdroăng ngoăi khoă ăm mâu vâi o ti tăng plĕng ‘na luât rak tơniăn troăng klông vâ tơniăn drêng kơto rơxế’’.

Tung pơla kố nah, khu kan sát rak tơniăn troăng klông Dak Nông hiăng đi đo thăm pơtâng tối hnê ‘na luât ‘na rak tơniăn troăng klông troh hok tro mâu hngêi trung tung kong pơlê. Thươ̆ng tă Phạm Quốc Lập, Kăn pơkuâ Ƀơrô Kan sát rak tơniăn troăng klông – Kŏng an kong pơlê Dak Nông, tối ăm ‘nâi, rơtế ƀă đi đo séa ngăn, tơleăng kơtăng mâu ngế ki pro xôi, tíu cheăng mơnhên tơdroăng pơtâng tối mơdêk hlê plĕng, pêi pro tiô luât xuân cho troăng pêi ki má môi vâ tơniăn troăng klông tơdjâk troh rơxông hơnăm hok tro:

“Khu kan sát rak tơniăn troăng klông hbrâ tơrŭm ƀă Khu rak tơniăn troăng klông kong pơlê thăm pơtâng tối a mâu hngêi trung, a ngiâ cho a mâu kơpong ki drô troăng kân Hồ Chí Minh, a troăng kân tơnêi têa 28 ƀă tíu xiâm mâu tơring, pơlê kong kơdrâm dêi kong pơlê Dak Nông. Má péa cho hbrâ tơrŭm ƀă mâu khu pơkuâ pơtâng tối troh nôu pâ hok tro ôh tá pơcháu rơxế ăm kuăn ‘nĕng dêi tơná drêng tá hâi tŭm hơnăm vê rơxế. Rơtế amê pêi pro tơdroăng pơtâng tối troh mâu kơpong hơngế hơngo ƀă tơniăn mơjiâng mâu troăng pêi bo cheăng hngêi trung tơniăn troăng klông tung lâp kong pơlê.