Veăng Hâi tăng rah mơngế pêi cheăng xua Vi ƀan pơlê kong kơdrâm Ƀuôn Ma Thuột tơrŭm ƀă Tíu xiâm mơdró tăng cheăng pêi kong pơlê Dak Lak tơkŭm po a poăng khế 5 pơla kố nah, Kŏng ti pêi cheăng tiô rơnó Vũ Nguyên Bio pơkâ rah xo ki vâ iâ 30 ngế pêi cheăng. Laga tơdroăng ki châ ôh tá môi tiah vâ. Nâ Nguyễn Thị Ý Nga, Kăn pơkuâ Kŏng ti tối ăm ‘nâi, rêm khế Kŏng ti ai tơdroăng kal vâ rah xo dâng 50 ngế ƀă mâu tơdroăng pêi cheăng môi tiah: ngế hơ’lâk kơphế, kih thuât viên spa, nail, ‘na tơdroăng mơdró ‘na ôm hyô, hngêi ăm tơmối kâ koi ối pơtê vâ ăm mâu tíu tăng rah mơngế pêi cheăng, laga sap apoăng hơnăm troh nôkố nếo rah xo châ 30 ngế pêi cheăng.

“Nôkố kơxô̆ mơngế pêi cheăng tăng rah mơngế pêi cheăng ăm Kŏng ti xuân tá hâi tŭm, xua Kŏng ti ai 3 tíu pêi cheăng cho Dak Lak, Dak Nông ƀă Phú Yên. Ôh tá tŭm xua mê chiâng ôh tá pơtroh ăm tíu pêi cheăng ki má 3’’.

Cho khu tê mơdró dế ai kơxô̆ mơngế pêi cheăng kân má môi a Dak Lak, ƀă dâng 1.500 ngế pêi cheăng. Kŏng ti Able Joy a kơpong hngêi kơmăi kơmok Hòa Phú xuân dế trâm pá pá tung tơdroăng rah xo mơngế pêi cheăng. Pôa Trần Chí Vĩ, Kăn phŏ xiâm pơkuâ Kŏng ti Able Joy tối, nôkố kŏng ti dế hbrâ vâ ăm pêi cheăng tíu pêi cheăng kơxô̆ 2. Tíu kố kal rah xo dâng 3.000 ngế pêi cheăng. Sap apoăng hơnăm troh nôkố, Kŏng ti hiăng tơdjêp hên troăng, tơrŭm ƀă hên tíu vâ rah xo mơngế pêi cheăng, laga bu tơdah châ dâng 300 hô sơ kĭ. Đơn ki kok vâ rah xo, hngêi kơmăi kơmok, tơmeăm mơjiâng pro tơmeăm dế pơxiâm pêi cheăng, laga mơngế pêi cheăng tá hâi tŭm pro Kŏng ti thế tăng mâu troăng pêi ki ê vâ tơniăn đơn ki kok vâ rah xo mơngế pêi cheăng:

“Đơn kok rah xo mơngế pêi cheăng hơnăm 2024 mê tâk 50%, hngêi kơmăi kơmok, tơmeăm mơjiâng pro tơmeăm pơkâ cho 1 – 6 kêi đeăng, ki hên nôkố cho mơngế pêi cheăng, tâng ai mê á hbrâ mơjiâng tơmeăm, laga nôkố dế kal mơngế pêi cheăng. Tâng ôh tá tŭm mơngế pêi cheăng mê thế ti tăng tâi tâng mâu tíu pêi cheăng, kŏng ti ki ê tŏng kum á mơjiâng pro tơmeăm vâ tơniăn đơn tơmeăm ki hiăng kĭ pro’’.

Tiô tơbleăng dêi Tíu xiâm tăng rah mơngế pêi cheăng kong pơlê Dak Lak, tung pái khế apoăng hơnăm 2024, ai lối 50 roh tíu cheăng, khu tê mơdró veăng tung 13 roh mơdró tăng rah mơngế pêi cheăng xua Tíu xiâm tơkŭm po ƀă tơdroăng kal vâ tăng rah xo lối 7.000 ngế pêi cheăng. Tíu xiâm xuân hiăng hnê mơhno cheăng pêi ƀă tơbleăng tơdroăng cheăng ăm lối 12.000 roh ngế, laga bu 440 ngế lăm pêi cheăng klêi kơ’nâi tơbleăng.

Xuân tung pái khế apoăng hơnăm 2024, Tíu xiâm hiăng tơdah vâ chê 1.500 hô sơ pơkâ thế châ kâ liăn ƀaoh hiêm ôh tá ai cheăng pêi. Tơdroăng kal vâ rah xo mơngế pêi cheăng hên, kơxô̆ ngế tơdah ƀaoh hiêm ôh tá ai cheăng pêi tâk laga tá hâi tơdroăng ki tơtro tơdjêp pơla mơngế pêi cheăng ƀă tíu rah xo mơngế pêi cheăng, cho tơdroăng ki tơrôu tâng pơchông ƀă tiah hmâ dế ai a Dak Lak. Tiâ tối ‘na tơdroăng pá puât kố, pôa Nguyễn Văn Cường, Kăn phŏ pơkuâ Tíu xiâm mơdró tăng rah mơngế pêi cheăng kong pơlê Dak Lak tối:

“Ki hên kơxô̆ mơngế pêi cheăng ‘na tŏng kum ƀaoh hiêm ôh tá ai cheăng pêi ki xiâm cho xo liăn tŏng kum hdrối, kơ’nâi mê nếo ti tăng cheăng pêi. Mâu ngế ki ‘na vâ tăng cheăng pêi laga hnoăng liăn mơhá a Dak Lak pơtối iâ tâ mâu kong pơlê peăng hdroh, xua mê vâi ôh tá vâ pêi cheăng ôh’’.

Pôa Nguyễn Quang Thuân, Kăn pơkuâ Khu pơkuâ cheăng pêi mô đô̆i rong râ ƀă rêh ối pơlê pơla kong pơlê Dak Lak mơnhên, kong pơlê dế ai mơngế pêi cheăng hên ƀă dâng 1,2 rơtuh ngế tro hơnăm pêi cheăng. Laga mâu hơnăm hiăng hluâ, Khu pơkuâ cheăng pêi Mô đô̆i rong râ ƀă Rêh ối pơlê pơla kong pơlê hiăng mơdêk tơdroăng tơdjêp, hnê pêi cheăng, hnê tối, tơbleăng cheăng pêi pơla mơngế pêi cheăng ƀă khu tê mơdró, pơla khu tê mơdró ƀă mâu kong pơlê vâ tơdjêp tơdroăng ki ai mơngế pêi cheăng – kal vâ mơngế pêi cheăng. Laga, tơdroăng châ tơƀrê tá hâi môi tiah pói vâ. Pôa Thuân tối, ing pá puât tung ti tăng mơngế pêi cheăng pơkâ thế khu tê mơdró kal mơdêk ki pơxúa ăm rêm ngế ‘na liăn ngân vâ râng chêng mơngế pêi cheăng.

“Pêi cheăng phôh thong cho hên, thăm nếo pêi cheăng ai chưng chih cheăng pêi xuân hên. Tơdroăng a kố cho mơngế pêi cheăng troh ƀă mâu khu tê mơdró lơ ôh tiô tung hên tơdroăng, tung mê tơdroăng ‘na liăn khế, tơdroăng ‘na tŏng kum rêh ối pơlê pơla, ‘na tíu pêi cheăng mê cho mâu tơdroăng ki mâu khu tê mơdró kal ai pơhlêh nếo, mơngế pêi cheăng xuân kal hâk vâ há vâ péa pâ trâm dêi pó’’.