A rôh po tơdroăng, 20 ngế teăng mâ ăm mâu tơdroăng tơkêa tơpui tối leăng tơdrêng ƀă tiâ mâu rơkong kơ-êng dê khu ki châm điêm ‘na ko ƀai, tuăn tơmiât pơxiâm vâ pêi cheăng dêi tơná. Kố cho mâu tơdroăng tơkêa rơkê má môi châ rah xo klêi kơ’nâi tơkâ luâ 2 rôh tơ’noăng ƀă rôh tơ’noăng sơ khảo, tơbleăng ing khế 2 pơla hdrối kố nah.

Klêi kơ’nâi 2 khế tơbleăng, rôh tơ’noăng kố hiăng châ lối 100 tơdroăng tơkêa, tuăn tơmiât rơkê dêi mâu hô̆i viên vâi kơdrâi veăng, pêi pro châ tiô inâi vâ hơ’lêh ngiât tung mơjiâng pro, tê mơdró. Mâu tơdroăng tơkêa, tuăn tơmiât rơkê ƀă mâu kế tơmeăm ki xiâm, xúa mâu tơdroăng ki rơdêi ing mâu kế tơmeăm dêi kong pơlê môi tiah kơphế, mắc-ca, kloăng hôt, loăng pơkeăng; xúa mâu kế tơmeăm kông hnông ƀă tơmeăm pêi lo ing chiâk deăng vâ mơjiâng bro; tơmeăm xúa môi hdroh rak tơniăn tơ’lêi chôu, hmâ ƀă kong prâi tơnêi tơníu.