Khu ngăn vâi kơdrâi mâu cheăm, pơlê kân tơrŭm séa ngăn mâu rơpŏng cho hdroâng kuăn ngo ai tơdroăng ki vâ mung liăn, tŏng gum tơnêi ối, hngêi ối, tơnêi pêi kâ, pơhlêh cheăng ƀă mơnhông mơdêk cheăng kâ tiô túa ki kơnía vâ tŏng gum liăn tiô pơkâ.

Troh nôkố, Khu ngăn vâi kơdrâi tơring pơtối pêi pro pơkâ thế Hngêi rak liăn tŏng gum rêh ối pơlê pơla ăm hô̆i viên vâi kơdrâi kơtiê mung liăn vâ mơnhông cheăng kâ ƀă kơxô̆ liăn mung lối 195 rơtal liăn. Pakĭng mê, Khu ki mung ƀă Hngêi rak liăn pêi chiâk deăng ƀă Mơnhông thôn pơlê Di Linh lối 10 rơtal liăn ăm lối 150 rơpŏng mung. Jâ Ka Hương - Kăn phŏ hnê ngăn vâi kơdrâi tơring Di Linh, kong pơlê Lâm Đồng ăm ‘nâi:

“Di Linh cho tơring ki ai hên hdroâng kuăn ngo rêh ối, tung mê, rơpŏng kơtiê xuân ối hên, tung mê ai rơpŏng mâu nâo o vâi kơdrâi hdroâng kuăn ngo. Khu ngăn vâi kơdrâi tơring hiăng ai hên troăng hơlâ tŏng gum vâ xut tah hrâ mơnguâ kơtiê ƀă hô̆i viên hdroâng kuăn ngo kơtiê. Môi tiah, hiăng pêi cheăng ƀă Hngêi rak liăn tŏng gum rêh ối pơlê pơla tơring pro tơ’lêi hlâu ăm hô̆i viên kơtiê châ mung liăn vâ pêi cheăng kâ rơpŏng hngêi, ƀă Khu ngăn vâi kơdrâi tơring xuân hiăng mơjiâng Khu râng liăn xua vâ gum mâu kơtiê, xua nâ o veăng tơlo rêm ngế ai 10 rơpâu liăn, ƀă nôkố khu râng liăn kố hiăng ai liăn tâk troh 1 rơtal. Ing kơxô̆ liăn kố, nâ o châ gum kơxô̆ liăn mơnhông cheăng kâ rơpŏng hngêi, xut tah hrâ mơnguâ kơtiê xơpá”.