*Dak Lak cho kong pơlê ki tro tơ’nhiê hên tơmeăm khoăng má môi tung rôh kong mê têa kân sap nah tá hâi chói ai kố tung pơla hdrối kố nah, ƀă riân ngăn ăm hlo lâp kong pơlê ai 55 ngế hlâ rong, 10 ngế hía, lối 150 rơpâu toăng tro têa lu trâu, tâi tâng ki lŭp tiô riân lối 5.500 rơtal liăn. Nôkố têa hiăng xiâ a tâi tâng mâu cheăm, bêng peăng mâ hâi lo kong pơlê, pro tơ’lêi hlâu vâ mâu khu ki veăng tŏng gum kuăn pơlê.

Pôa Lương Nguyễn Minh Triết, Kăn pơkuâ ngăn Đảng Dak Lak pơkâ thế hnê mơhno mâu khu ki pleăng dêi tơmeăm khoăng xoăng mâu kế kâ, têa tôu tơmeăm xúa tro tíu ki trâm xía vâ, tro ngế; tơdrêng amê hlối lo lăm mơgrúa lĕm kong prâi tơnêi tơníu kong prâi, malối cho a hngêi trung hriâm, hngêi pơkeăng vâ rĕng ‘mâi mơnhông tơdroăng khăm ăm pơlê.

Khu ngăn ‘na chiâk deăng ƀă Hyôh kong prâi, Khu ngăn tơmeăm tung têa a tơnêi ƀă hyôh kong prâi, Kŏng an kong pơlê ƀă Khu pơkuâ ngăn lêng kong pơlê hiăng pơtroh khu lêng gum kuăn pơlê gô̆m văng kui tah mâu tơnêi trâp, tôm xo mâu xok, ‘mêng rơnêu mâu hngêi trăng, mơ-eăm rĕng ăm tơdroăng rêh ối châ vêh tiah hmâ.

*Pôa Tạ Anh Tuấn, Kăn xiâm hnê ngăn Vi ƀan Kuăn pơlê kong pơlê Dak Lak nếo lăm troh a mâu kơpong ki tro tơdjâk ó lăm séa ngăn vâ ‘nâi tơdroăng tŏng gum tơkâ luâ xơpá kong mêi têa lân lu xua Khu xiâm pơkuâ ngăn lêng kong pơlê Dak Lak tơbleăng pêi. Nôkố hrĭng ngế kăn ƀô̆, mâu lêng dêi Trung đoân 584 ƀă Trung đoân 888 dế tŏng gum kuăn pơlê mơgrúa văng tah trâp, ‘mâi ‘măn mâu tơmeăm, xếo hngêi trung, hngêi pơkeăng, tơbleăng pêi túa “Hơpêap on mâu lêng - Kuăn pơlê” vâ tơniăn mâu rôh kâ hmê,  rêh ối ăm kuăn pơlê kơpong tro têa lân lu.

Kăn xiâm hnê ngăn Vi ƀan Kuăn pơlê kong pơlê pơkâ thế mâu đông lêng tíu pêi cheăng pối veăng kuăn pơlê, tăng ngăn nhên, pôi tá ăm kuăn pơlê châ kơklêa, hlối pâ thế mâu tíu pêi cheăng, kơvâ cheăng  tơrŭm krá  ƀă mâu lêng  tung ‘mâi mơgrúa hyôh kong prâi, mơgrúa kơnhŏng têa, riân ki lŭp vâ kơjo kum ‘mâi mơnhông pêi chiâk, vâ rĕng tơniăn tung rêh ối, tơniăn ivá ƀă cheăng kâ ton hơnăm ăm kuăn pơlê klêi kơ’nâi kong pêi têa lân lu.

*A Gia Lai ƀă Khánh Hòa, cheăng hbrâ mơdât pơreăng klêi kơ’nâi kong mê têa kân châ tơbleăng pêi tơdrêng vâ rak vế ivá châ chăn ăm kuăn pơlê. Khu ngăn pơkeăng pơlât rêm kong pơlê hiăng pơtroh lối chât ngế kăn ƀô̆, mâu ngế cheăng lăm chu troh a mâu cheăm ki tro têa lân lu trâu vâ xôh pơkeăng tung tơnêi tơníu, hrik tah mâu têa ki mơ’nok, hnê kuăn pơlê mơgrúa lĕm châ chăn dêi tơná, gô̆m văng mâu xok, vâ kơdroh ki pơreăng tâ tú.

Hdrối mê, Khu xiâm ngăn pơkeăng pơlât hiăng pơtroh vâ chê 10 tâ̆n trếo pơkeăng xôh kơdê pơreăng tung têa ƀă lối rơpâu tơdrong pơkeăng ăm mâu rơpŏng ki kal vâ cho Khánh Hòa, Gia Lai, Dak Lak vâ hbrâ mơdât klêi kơ’nâi kong mê têa kân. Kơvâ ngăn pơkeăng pơchân kuăn pơlê pôi tá ôu têa tá hâi xôh pơkeăng kơdê pơreăng, thăm mơnhông tơdroăng ki mơgrúa lĕm hngêi trăng, kơdroăng rông, tơdrêng amê hlối tơrŭm ƀă kơ koan ki ai tơdjâk tung séa ngăn ƀă châ hlo tơdroăng ki ôh tá tơniăn.