Kong măng lơ 21/5, a hngêi chuô Quán Sứ, Hà Nội, Yăo hô̆i Phật giáo Việt Nam tơdah tông um Xeăng Phop ƀă rơxế reăng nhuô̆m hâk hâi Xeăng Phop kot mâ Phật lịch 2568 – Yương lĭt 2024 pâ ăm tơnêi têa tơniăn, kuăn pơlê hơniâp. Tơdah tông Xeăng Phop ƀă rơxế reăng hâk nhuô̆m ƀok Phật đản kot mâ po ing 19 chôu troh 21 chôu, ƀă tơdroăng ki veăng ai mâ dêi lối rơpâu ngế tiô khôp, mâu ngế ki hriâm vâ pro Ƀok  Phop, rơtế ƀă hên hĭn mâu kuăn pơlê tiô khôp veăng koh hâk.

Khu rơxế reăng rơtế ƀă um Xeăng Phật đản kot mâ lo ing tíu Xiâm tơnêi têa Yăo hô̆i Phật yăo Việt Nam 73 Quán Sứ, prôk tơkâ luâ mâu kơphô̆ Lý Thường Kiệt, Bà Triệu, Trần Hưng Đạo ƀă vêh a 73 Quán Sứ, Hà Nội. Ƀă rêm ngế ki ƀok jâ phop, mâu ngế ki ối cheăng tung hngêi chuô leh Phật đản cho tơdroăng ki hơniâp ro châ vêh mơhno, rơtế ƀă hiâm mơno môi tiah Ƀok Phop dế ai mâ, hnê mâu rơkong ki lĕm tro, pâ nhuô̆m, tuăn ngoâ, hnê tơdroăng pro ki lĕm kô trâm tơdroăng ki lĕm.