A pơlê kong kơdrâm Gia Nghĩa, Khu xiâm ngăn Kŏng an tơrŭm ƀă Vi ƀan hnê ngăn kong pơlê Dak Nông rơtế ƀă mâu tíu pêi cheăng tŏng gum tơkŭm po leh tơbleăng rôh lo lăm pêi cheăng mơjiâng, têa tah hngêi ối pơtân, hngêi tơ’nhiê xi kơchoh; tơdrêng amê hlối tơdah xo kơxô̆ liăn ƀă pơcháu toăng hngêi ki pơkâ thế pro tiô ƀối ăm kuăn pơlê. Nâ H’Yơi (hdroâng M’Nông) a ƀon Ting Wel Đơm, cheăm Dak Nia, pơlê kong kơdrâm Gia Nghĩa phiu ro drêng châ tơdah xo hngêi ki lĕm krá kố ăm ‘nâi:

“Rơpŏng hngêi á phiu ro khât xua châ mot ối tung hngêi ki nếo. Tâi rơpŏng ai 6 ngế ro khât, ôh tá tôu xếo drêng kong mê khía pêi mot a rơnó mê, kong tôu kơtâk ‘mêi krêa a rơnó tôu. Hdrối nah tá hâi ai hngêi ối kơkôm to a pôa peăng nôu, nôkố hiăng ai hngêi nếo mê ôh tá ối dêi ƀă pâ xếo. Mơnê Đảng ƀă Tơnêi têa, kơvâ kŏng an”.

Toăng hngêi ki châ pơcháu ăm rơpŏng nâ H’Yơi rơdâ 50m2, mơnât meăn gât, kuâ lêm tôl, trêi lêk gât men. Tâi tâng kơnâ cho 120 rơtuh liăn, tung mê 60 rơtuh cho kơxô̆ liăn ing mơhnhôk veăng tơlo dêi Khu xiâm ngăn Kŏng an, 20 rơtuh cho kơxô̆ liăn ing liăn ngân kong pơlê, u ối cho xua mâu khu ki ai hiâm mơno hơ-ui tŏng gum ăm rơpŏng.

Trung tươ̆ng Phạm Thế Tùng, Phŏ ngế xiâm ngăn Kŏng an, Khu xiâm pơtối mơhnhôk mâu khu ki ai hiâm mơno hơ-ui tung lâp tơnêi têa, ƀă kơxô̆ liăn dâng 280 rơtal. Krê Dak Nông, Khu xiâm hiăng mơhnhôk ƀă diâp 30 rơtal liăn vâ gum pro 500 toăng hngêi ăm rơpŏng kơtiê, vâ chê kơtiê ƀă rơpŏng châ tơnêi têa gum ai tơdroăng rêh ối xơpá ‘na hngêi ối. Trung tươ̆ng Phạm Thế Tùng tối tơngah tiah kố, mâu toăng hngêi ki krá kâk kố kô gum kuăn pơlê tơniăn tung rêh ối.

“Á mơnê tơdroăng ki tơrŭm krá tơniăn dêi mâu khu râ, kơvâ cheăng ƀă mâu ki tŏng gum hiăng rơtế prôk ƀă Khu xiâm ngăn Kŏng an pêi pro tơdroăng ki ai pơxúa kố ƀă rơkê plĕng kố. Á loi tiah kố, ƀă tíu ối nếo krá kâk, lĕm, tơniăn tơdroăng rêh ối, mâu rơpŏng kô hmiân tuăn pêi cheăng pơtối mơ-eăm tung tơdroăng rêh ối; kơhnâ veăng rak vế tơniăn gâk kring, mơjiâng tung tơdroăng mơnhông cheăng kâ rêh ối pơlê pơla a kong pơlê”.

Tiô pơkâ, kong pơlê Dak Nông kô têa tah tâi tâng 1.755 toăng hngêi ki hiăng tơ’nhiê, gum rơpŏng kơtiê, vâ chê kơtiê, rơpŏng ki châ tơnêi têa tŏng gum ƀă kuăn pơlê hdroâng kuăn ngo tung lâp kong pơlê. Riân troh nôkố, kong pơlê hiăng pêi klêi dâng 75% tơdroăng cheăng ƀă tiô tối hdrối kô pêi klêi tơdroăng ki têa tah hngêi ối pơtân, tơ’nhiê xi kơchoh hdrối hâi lơ 30/8 hơnăm kố.

Pêi pro tơdroăng têa tah hngêi ối pơtân, hngêi ki hiăng tơ’nhiê xi kơchoh xua Chin phuh tơbleăng, tung pơla hdrối kố nah, Khu xiâm ngăn Kŏng an hiăng mơhnhôk pro lối 28.600 toăng hngêi ƀă hên hngêi trung hriâm, ƀă tâi tâng kơxô̆ liăn pro lối 1.400 rơtal. Krê sap ing apoăng hơnăm 2025 troh nôkố, khu Kŏng an hiăng veăng tơlo châ 362 rơtal liăn sap ing liăn khế vâ pro lối rơpâu toăng hngêi tơrŭm diâp ăm mâu rơpŏng a Cao Bằng ƀă Gia Lai.

Riân troh tơdế khế 5, tung lâp kong pơlê Gia Lai hiăng pro ƀă ‘mêng dâng 7 rơpâu 500 toăng hngêi ối pơtân, hngêi hiăng tơ’nhiê xi kơchoh, châ lối 90% túa pơcháu. Tiô riân ngăn, troh nôkố, tung kong pơlê Gia Lai hiăng ai 7 to tíu pêi cheăng râ tơring pêi klêi tơdroăng pơcháu mê cho: Pơlê kong kơdrâm Pleiku, pơlê kong krâm An Khê, pơlê kong krâm Ayun Pa, mâu tơring Đăk Pơ, Đức Cơ, Krông Pa ƀă Phú Thiện. Hên tơring maluâ tá hâi pêi pro la xuân hiăng châ mâu toăng hngêi pơkâ ki thâ têa tah môi tiah tơring ‘Mang Yang têa tah châ 707 toăng (châ lối 85%), Krông Pa 404 toăng (73,3%), Čư̆ Pưh 437 toăng (46,5%) ƀă hên tơring ki ê.

Pôa Nguyễn Quyết Thắng, Kăn hnê ngăn Vi ƀan cheăm Ia Peng, tơring Phú Thiện, kong pơlê Gia Lai ăm ‘nâi, ƀă tơdroăng ki xiâm a kơpong hdroâng kuăn ngo, kuăn pơlê púi vâ pro hngêi trá khôi hmâ, kăn pơkuâ xuân pro tơ’lêi hlâu vâ vâi krâ nhŏng o ai hngêi ối tơtro ƀă khôi túa tơlá.

“Tung pơla tơbleăng mê ngin xuân krếo thế mâu rơpŏng kuăn pơlê vêh vâ môi tuăn tung pơla tơbleăng pro, ‘mêng rơnêu hngêi mê ai mâu rơpŏng ki kuăn pơlê hdroâng kuăn ngo mê tiô tơdroăng púi vâ dêi kuăn pơlê mê ‘mêng rơnêu ƀă pro nếo hngêi trá khôi hmâ. Tung tơdroăng mê, ngin xuân pơkâ ăm kuăn pơlê pro hngêi trá tro ƀă ƀăng tơnêi, rak vế “3 krá” ƀă lĕm”.

Hên rơpŏng kuăn pơlê hiăng xo tơ’nôm liăn vâ po rơdâ ƀăng tơnêi pro hngêi ƀă pro tơ’nôm plông, kơnâng, hngêi mơdrah. Kơnôm tiah mê, troh nôkố, tơdroăng ki têa tah hngêi ối pơtân, tơ’nhiê xi kơchoh a Gia Lai hiăng gum lối 4.500 rơpŏng kơtiê, vâ chê kơtiê tơniăn rêh kâ ối, tơdrêng amê hlối pơhlêh nhên ‘na ngiâ méa thôn pơlê, mơdêk tơ’nôm tơdroăng loi dêi Kuăn pơlê ƀă troăng pơkâ, tŏng gum pơlê pơla dêi Đảng ƀă Tơnêi têa.

Tơdroăng têa tah hngêi ối pơtân tơ’nhiê xi kơchoh ôh ti xê pro pơxúa ai hngêi ối lĕm krá ăm lối rơpâu rơpŏng kơtiê, mê ối mơhno ăm tơdroăng rêh ối lĕm ăm hiâm mơno “xua kuăn pơlê chiâng gum” dêi khu Kŏng an kuăn pơlê, tơdroăng tơdjuôm ivá pôu râng dêi hnoăng dêi rêm râ, mâu kơvâ cheăng ƀă tâi tâng pơlê pơla. Mâu toăng hngêi nếo ôh ti xê gum kuăn pơlê tơniăn rêh kâ ối, hmiân tuăn mơnhông cheăng kâ, mê ối veăng gum pro pơhlêh ngiâ méa thôn pơlê, thăm mơnhông tơdroăng loi dêi Kuăn pơlê tung troăng hơlâ tŏng gum gâk kring rêh ối pơlê pơla dêi Đảng, Tơnêi têa.