Laga, tơdroăng ki ‘nâi tơ’nôm ối ai lối 1.300 rơpŏng kuăn pơlê ai hngêi ối pơtâ, xi kơchoh mê kong pơlê kal mơhnhôk tơlo tơ’nôm liăn ăm tơdroăng kố.

Tiô Khu ngăn hdroâng kuăn ngo ƀă tơdroăng loi tĭng tiô khôp kong pơlê Kon Tum, xiâm kối chiâng ai tơ’nôm lối 1.300 rơpŏng kuăn pơlê ai hngêi ối pơtân, xi kơchoh xua drêng séa ngăn apoăng hngêi ối châ mơnhên pơkâ pêi tro la xua tơdjâk ing kong mê khía mơhot, têa lân lu mê hngêi hiăng tơ’nhiê ôh tá tơniăn xếo; tung pơla séa ngăn tiô pơkâ dêi Khu xiâm mơjiâng tơmeăm khoăng pơkâ ai tơ’nôm kơxô̆ rơpŏng châ gum tiô pơkâ; Hâi khế chêh xo, tâi tâng kơxô̆ ki ăm ‘nâi apoăng châ pêi pro tung pơla iâ khế mê chiâng ai tơdroăng ki châ séa ngăn tâi rơpŏng, châ xúa.

Ôh tá riên kơxô̆ hngêi pơtân, hngêi xhi kơchoh nếo ‘nâi,  riân troh nôkố hâi lơ 21/5, kong pơlê Kon Tum hiăng têa tah hngêi ối pơtân, xi kơchoh ăm 2.622 rơpŏng, tung mê pro nếo 2.077 ƀă ‘mêng 545 hngêi ki ton châ 95% tung tâi tâng kơxô̆ 2.752 rơpŏng kal châ têa tah hngêi ối pơtân.