Tơdroăng kố xua Tíu xiâm Khu ngăn vâi kơdrâi Việt Nam tơbleăng vâ tŏng gum, păn răk vâi hdrêng kuăn tê ai tơdroăng rêh ối pá puât. Klêi kơ’nâi vâ chê 5 hơnăm tơbleăng, a Gia Lai hiăng ai 172 ngế nôu xo râng ko ƀă 150 ngế nôu râng ko ing hngế. Mâu nôu đâng a kong pơlê dế tŏng gum, răk ngăn, păn roăng 407 ngế hdrêng kuăn tê.

Ing hên tơdroăng tŏng gum, tơdroăng kố ối pơtroh diâp lối 57.000 kơxuô tơmeăm, 580 hnoăng liăn hriâm rơkê, 185 toăng rơxế mai, gum ‘mêng hngêi ăm hdrêng kuăn tê ƀă hên ki ê kơnâ vâ chê 10 rơtal liăn. A rôh leh, mâu kăn hiăng tơpui tơno mâu tơdroăng ki rơkê plĕng, túa pêi ki tro ‘ló tung tơdroăng tơdjêp pơlê pơla, krếo thế mâu khu tơrŭm, mâu ngế krê tơdjuôm ivá rak ngăn vâi hdrêng kuăn tê; veăng gum mâu tơdroăng ki ối tơchĕng tơmiât dêi kăn ƀô̆ Hô̆i drêng tơbleăng tơdroăng kố; hiâm mơno dêi mâu vâi nôu ki xo râng ko drêng mâu vâi hdrêng vâi hlo tơviah, ôh ti hmâ, pro ăm vâi o ai tíu ối hơtôu lĕm.