Pơtối mê, tơdroăng po rơdâ pêi pro tiô a mâu Pơkâ kơxô̆ 178 ƀă 67 dêi Chin phuh, rơtế ƀă mâu mơ-éa hnê mơhno dêi Khu xiâm pơkuâ kăn ƀô̆ ƀă Vi ƀan kong pơlê. Vi ƀan kong pơlê Dak Lak pơkâ mâu kơ koan, tíu pêi cheăng mơdêk pơtâng tối, hlê plĕng pêi pro tŭm mâu tơdroăng xiâm tơdjâk troh khu kăn ƀô̆, kŏng chưk, viên chưk ƀă mơngế pêi cheăng, vâ rak tơniăn pêi pro tro tiô pơkâ.

Tung tơdroăng rah xo bro lế lĕm tro mơngế pêi cheăng, tâng ai kăn ƀô̆ vâ pâ xêh pơtê cheăng xua hơnăm hiăng krâ lơ pâ pơtê cheăng, mâu kơ koan kal séa ngăn inhên vâ mơnhên tro mơngế, ôh tá ăm pơtê ƀă mâu ngế ki chiâng pêi cheăng, tơxâng tiô pơkâ tơdroăng cheăng. Hô sơ pơkâ thế mơhá liăn kal tŭm tơbleăng mơnhên tiô pơkâ inhên, tro ƀă mâu pơkâ pêi ƀă mơ-éa hnê mơhno dêi kong pơlê. Troh nôkố, Dak Lak ai dâng 1.086 kăn ƀô̆, kŏng chưk, viên chưk ƀă mơngế pêi cheăng pâ pơtê cheăng rĕng xua hơnăm hiăng krâ lơ ăm pơtê cheăng.

Tung mê, 806 ngế pơtê cheăng hdrối hơnăm ƀă 280 ngế pơtê cheăng. Tung kơxô̆ kố ai 28 kăn ƀô̆ ing râ tơring tơngi klêng, 198 kŏng chưk, 131 viên chưk, 714 kăn ƀô̆, kŏng chưk cheăm ƀă 22 ngế pêi cheăng tiô troăng hơp đông pêi cheăng.