Tơ̆ chŭn pơtăm ƀum yuăn tơ̆ xăh Đắk N’Drót, apŭng Đắk Mil, dêh char Đắk Nông, jơhngơ̆m bơ̆jang tôch kơ chhôk hơiă. Vă jê̆ 30 ‘nu kŏng nhân tŏk bŏk hăt hot rô̆ ƀum yuăn, nơ̆r hiơ hiĕk pơđeng hrâu hăm kơmăy re dơ dŭk. ‘Nhŏng Y Đắp Kbuôr, oei tơ̆ plei Trắp B, xăh Cư Mgar, apŭng Cư Mgar, dêh char Đắk Lắk tơroi, sư đĭ năm đơ̆ng pơgê hrôih vă tơtom vang rô̆ ƀum yuăn tơ̆ âu.

“Vă tơtom rô̆ tơgŭm bơngai jang pơgar, kon pơlei nhôn akŏm năm rô̆. Nhôn tôch kơ chơt hơiă, đei tơdrong jang đei dơ̆ng jên  yua blŭng pơyan puih mak.”

Kŭm đei măt đơ̆ng hrôih vă kơ tom iŏk jang, yă Lê Thị Lan, tơ̆ xăh Ea Drơng, tơ̆ apŭng Cư Mgar, dêh char Đắk Lắk tôch kơ chhôk ‘nă ƀơ̆t năr blŭng năm tơ̆ chŭn đei tơ ‘ngla pơgar lì xì vă kơ pŭn.

“Lơ̆m năr blŭng nhôn năm jang rô̆ tơgŭm bơngai jang pơgar, nhôn tôch kơ chhôk ‘nă. Năr blŭng đei iŏk lì xì, ‘meh sơnăm 2025 đei lơ tơdrong jang sơđơ̆ng”.

Ƀok Lại Cao Điền, tơ ‘ngla jang ƀum roi tơbăt, 7hek tar ƀum yuăn Nhật âu hlôi đei bơngai mơdro răt păng 2 păh hlôi pơma dơnuh, drơ̆ng nơ̆r khei ‘năr pơjao iŏk tơmam. Yua kơ đĭ pơma dơnuh hơdrol kơna kơsô̆ bơngai jang rô̆ đơ̆ng Đắk Lắk hlôi akŏm hao gre năm vă rô̆ tom năr, vei sơđơ̆ng jơ năr chơ tơmam ăn bơngai mơdro.

“Hrei ‘nâu kơjă tĕch kŭm tŏk bŏk tŏk kơna tơgĕch jơ năr têt tŏ hiôk, bơngai mơdro ‘noh hlôi drơ̆ng ăn păng đĭ răt kơna nhôn đơ̆ng lơ̆m sơnăm hăm kơjă 12.000 hlak jên 1 kĭ tơ̆ pơgar păng kŭm hlôi hơmet ăn bơngai jang, pơlung tơgŭm băl. Năr têt chơt hơiă pơyan puih mak ‘nao mă lei ưh kơ hiơt hơnăp jang ‘noh ‘năr 4 nhôn pơtơm năm jang rô̆ ƀum đĭ truh khei ‘năr rô̆ vă hơnhăk tơmam truh tơ̆ anih tĕch mơdro tơtom”.

Dôm năr âu kŭm jing khei ‘năr lơ kon pơlei jang chŭn mir dôm dêh char Tây Nguyên năm tơ̆ pơgar tơruih cheh phe, sầu riêng păng lơ kơloăi ‘long pơtăm nai. Tŏk bŏk tơruih 1 hek tar cheh phe hrâu hăm sầu riêng, ƀok Vũ Văn Thắng, tơ̆ thị trấn Ea Tling, apŭng Cư Jút, dêh char Đắk Nông tơroi:

“Dôm năr âu ki ‘noh nhôn kŭm oei tơ̆ hnam ngôi pơchơt, kon pơlei sơnăm ‘nâu tôch chhôk ‘nă, sa đei 1 ‘măng têt hiôk chơt. ‘Năr 4 tết kon pơlei nhôn pơtơm tơruih cheh phe, tơruih sầu riêng, kŭm tôch kơ ‘meh ‘noh jĭ kơjă tĕch sơđơ̆ng thoi âu, hơtuch sơnăm ‘noh kon pơlei chhôk ‘nă”.

Ƀok Y Danh Niê, oei tơ̆ plei Knia 3, xăh Ea Bar, apŭng Buôn Đôn, dêh char Đắk Lắk kŭm tŏk bŏk tăh đing ƀek vă tơruih cheh phe. Ƀok Y Danh roi tơbăt đĭ tơruih ‘măng mă blŭng đơ̆ng hơdrol ‘năr 20 khei 12 âm. ‘Nâu sa têt đang ‘noh pơkao cheh phe kŭm đĭ jô kro, lăp ƀlep ‘măng tơruih mă 2. Tơruih cheh phe đang ‘noh ŭnh hnam vă yuă ƀa păng dang hơtuch khei mônh âm ‘noh phĕ tiu.

"Đĭ têt bơih dang ei ŭnh hnam hơnơ̆ng akŏm tơruih đak ăn kơ cheh phe, tiu. Sơnăm ‘nâu ŭnh hnam nhôn hơmŏ pơgar cheh phe, tiu bluh jing ‘lơ̆ng, lĕch pơkao kơtĕn plei lơ vă đei pơyan phĕ đei plei lơ. Kŭm ‘meh kơjă pơđĭ sơnăm ‘nâu kơjung ƀiơ̆ vă tơdrong hơrih sa ŭnh hnam đei sơđơ̆ng ƀiơ̆ pơting hăm sơnăm âu ki.”

Đơ̆ng rŏng dôm năr chơt hơiă pơyan puih mak sơng têt, kon pơlei dôm dêh char Tây Nguyên ‘noh hăt hot kơ jang sa. Lơ̆m jơhngơ̆m đon chhôk hơiă kơ pơyan puih mak, kon pơlei hơmŏ lơ̆m 1 sơnăm jang sa hiôk, ‘mi rŏ tŏ hơlăng, đei plei lơ, kơjă tĕch sơđơ̆ng.