Vă đĭ khei 4 sơnăm 1975, ‘măng iung tơblăh Hồ Chí Minh yak mơ̆t lơ̆m khei ‘năr kăl hloh. Vă iung tơblăh kơtang truh tơ̆ Sài Gòn, khul Ƀô̆ đô̆i pơm rơngei măh kơrŭn yak hloh rim kơđông khul linh tơm kơ Khul kơdră chĕp pơgơ̆r Sài Gòn, lơ̆m ou đei kơđông Đồng Dù, Củ Chi, mĭnh hơnih kơjăp iăp kơtang kơ Sư đoàn 25 mă Mi ‘măn ăn. Ƀô̆ đô̆i so Nguyễn Quang Luyến, oei tơ̆ trong Nguyễn Thị Định, phương Thành Nhất, pơlei tơm Buôn Ma Thuột, ƀô̆ đô̆i C17 – Trung đoàn 48 – Sư đoàn 320A, bơngai hlôi atŭm hăm Khul ƀô̆ đô̆i pơm rơngei đơ̆ng kơdrăn tơblăh Tây Nguyên iung năm tơblăh Sài Gòn chhưu jơhngơ̆m tơroi dơ̆ng:“Pơgê năr 29/4 ƀlep ƀơ̆p nơ̆r tơbăt athei prăh đơ̆ng hơtăih, mưh ƀlep 6jơ 10 mưh ‘nhui gơlŭng gơlăng ‘noh mă iung tơblăh tơdrŭt. Mưh pơih trong tơblăh tơdrŭt ‘noh kăl đei trong yă đơ̆ng 8 truh 9m vă gre nar bơ̆n găh rŏng yak mơ̆t. Mưh 2 tong gre nar ‘noh ƀrơ̆m kơmlo ưh kơ đoh, ba măh chĕp găr năt pơm kơdih druh kiơ̆ gre nar yak năm tơ̆ dur tuch luch, mă đơ̆ng lôch hơrih lơ liơ khŏm pơ̆ih đei trong vă khul ƀô̆ đô̆i kĕ mơ̆t hlom. Ba hyot khoă găr năt mŭk brum, lăp ưh kơ đunh ‘nhui gơlŭng ưh kơbăt yă kiơ hloi. Mưh hơ ‘nơ̆r ‘noh gre nar đĭ tơ̆ hơnăp bơih, ƀrơ̆m phao prăh djơ djrĭng djơ drăng dang lĕ năr lêh. Tơblăh tôch hli hlơt mă lei lăng nhen lĕ năm pơm lêh, ba ƀôh tim lăh đei lơ lou”

Lăp đơ̆ng rŏng yak hloh jăl trong tang găn tơm Củ Chi – Đồng Dù, rim pang iung tơblăh đơ̆ng khul ƀô̆ đô̆i pơm rơngei tĕnh koăng pơvang hơnih kơdrơ̆m Sài Gòn. ‘Năr dơ̆ng năr 30/4/1975, khul gre nar Lữ đoàn 203, Quân đoàn 2, hlôi yak hơyoh năm tơ̆ Dinh Độc Lập – hơnih tơm chĕp kơ̆l khul kơdră chĕp pơgơ̆r Sài Gòn lơ̆m mă noh sơ̆. Gre nar yak hơdrol đei kơsô̆ 843 kơ yuơ Đại đội trưởng Bùi Quang Thận chĕp kơl vơ̆r tơ̆m hloi ‘măng jang păh ‘ngieo. Kơ yuơ ‘măng kơjăp kơna gre dơ̆ng. Tong gre nar kơsô̆ 390 kơ yuơ Chính trị viên Vũ Đăng Toàn chĕp kơ̆l yak đơ̆ng rŏng ploi hơdrol tơ̆m păk ‘măng jang tơm kơ Dinh Độc Lập. 11 jơ 30 pơnĭt năr 30-4-1975 hla kơ Rơngei păr mơliơk tơ̆ pơbŭng hnam Dinh Độc Lập. ‘Nou jing jơ ‘năr gĭt kăl hloh tơbăt hơdăh ‘măng iung tơblăh Hồ Chí Minh hlôi jơnei keh kong. Ƀok Nguyễn Thanh Cảnh oei tơ̆ phương Thành Nhất, pơlei tơm Buôn Ma Thuột, sĩ quan radeo găh Hơnih tơm khul jang Kơtơ̆ng ang – Quân đoàn 2, sơng iŏk nơ̆r tơchơ̆t athei chih tơbăt kơtơ̆ng ang ‘măng iung tơblăh jơnei hơdơ̆r dơ̆ng:“Nhôn yak tơ̆ trong ƀĕnh ƀang tơdrong hli hlơt hơmơt tơt, khul ayăt răp tơblăh mă lei nhôn jei kĕ yak hloh ngăl. Lơ̆m năm mơ̆t ‘noh păh ‘ngieo ĭnh đei mĭnh tong gre nar tơhlăk tơ̆ noh. Đơ̆ng noh gre nar 390 kơdŭn tŏ sĕt đơ̆ng noh tơ̆m tơklă ‘măng jang mơ̆t hloi. ‘Nhŏng Thận iŏk hla kơ lơ̆m gre đơ̆ng noh tŏk tơ̆ hnam tăl 2 hơtol hla kơ rơngei. Lơ̆m mă noh Bùi Hữu Hạnh mă ba Dương Văn Minh lĕch. Dương Văn Minh tơroi khan, nhôn gô vă pơjao, ‘noh ‘nhŏng Thận pơma akhan ưh kơ đei pơjao sơng iŏk yă kiơ ôh, iĕm jei bơih, dăh kŭp kơl yơl ti văi. Lơ̆m mă noh nhôn bu bu jei nhơ̆m, chơt hơ iă, hiôk chơt pă băt dang yơ hloi.”

Tơ̆ lơ̆m tơdrong jang hrĕp mă lei jei tôch git kăl, ƀok Mai Văn Tiêm, oei tơ̆ trong Thủ Khoa Huân, pơlei tơm Buôn Ma Thuột, sơ̆ kơdră chĕp pơgơ̆r Đài mật mã K26 – Bộ Tư lệnh Quân đoàn 3, vang yak hơdoi hăm khul kơdră chĕp pơgơ̆r iung tơblăh, chhưu jơhngơ̆m tơroi:“Hơnih nhôn đei vei lăng tôch kơjăp kơ yuơ nhôn kiơ̆ Đại tướng Văn Tiến Dũng. Năr 30/4 ĭnh ‘nao tơplih iŏk bơ̆ jang, ĭnh plôih mơ̆ng Radiô rapor Sài Gòn ‘noh kơtơ̆ng Dương Văn Minh tơchơ̆t kŭp kơ̆l yơ̆r ti, ĭnh mă chhôk ‘nă chă pơlŏng.Ĭnh hơdơ̆r lăp kơtơ̆ng nơ̆r pơma: “Ĭnh Dương Văn Minh Ƀok kơdră tơm pơgia Việt Nam Cộng hòa tơchơ̆t, apĭnh kŭp kơ̆l yơ̆r ti hăm khul Ƀô̆ đô̆i pơm rơngei tơring Pơbăh Việt Nam”, đơ̆ng mă noh ĭnh mă hơmrăi: Ơ ‘nhŏng oh ăi, ayăt kŭp kơ̆l yơ̆r ti bơih. Chôk hơ iă ‘nă hal pă băt dang yơ hloi, mưh tơchĕng truh tơdrong ‘nou jĭ ‘meh vă nhơ̆m đĕch, hơ iă dêh.”

Dôm bơngai ƀô̆ đô̆i nhen ƀok Luyến, ƀok Cảnh, ƀok Tiêm… jĭ dôm bơngai ƀôh kang bang kơl ăn tơdrong nuih mơng pran kơtang pơyan Puih mak sơnăm 1975. Ƀlŏk hơdơ̆r găh rim ‘măng iung tơblăh jơnei tơ̆ kơđông 25 – Đồng Dù, dôm tơdrong iŏk jơnei tĕnh koăng tơ̆ Dinh Độc Lập, dăh mă jơva aloa rapor nơ̆r tơchơ̆t kŭp kơl yơ̆r ti lơ̆m Radiô rapor Sài Gòn, oei ling lang vang vơch lơ̆m jơhngơ̆m đon ƀô̆ đô̆i so sơ̆-nhen mĭnh ‘măng dơ̆ng tơblŏk ăn tơdrong hơpơi ‘meh vă iŏk đei rơngei hiôk hian, pơm tơm kơdih.