Jăl sơnăm 2026-2030, 2 pah drơ̆ng nơ̆r hơtŏk jang hơdoi gah tĕch pơdro, asong jang, choh jang xa, jang tơmang pơhiơ̆, pơtho pơhrăm, hơtŏk bơngai jang, joh ayŏ tơpôl păng vei sơđơ̆ng tơpôl. Lơ̆m noh, 2 dêh char gô hơtŏk jang hơdoi hơnih jang mŭk drăm, hơtŏk tĕch pơdro, asong jang, tơroi dih băl gah tơdrong hlôh vao lơ̆m pơm jang, pơm tơlĕch tơmam choh pơtăm păng pơjing dôm tơmam drăm tơmang pơhiơ̆ atŭm.

Đăk Lăk păng Champasak hơdrin 'nhăk kơjă tĕch pơdro kơ 2 pah tŏk đơ̆ng 15-20% rim sơnăm păng hơtŏk pơjing đơ̆ng 5-10 tơdrong asong jang lơ̆m 5 sơnăm. Ƀok Nguyễn Thiên Văn, Phŏ Kơdră Hơnih jang vei lăng kon pơlei dêh char Đăk Lăk akhan, tơdrong pơih să jang hơdoi gah mŭk drăm gô pơjing jơhngơ̆m pran ăn tơdrong jang tơbôl kơ 2 tơring.