Khul bơ̆ jang dăr lăng tơdrong bơ̆ jang pơgơ̆r pôk rơih Kơdră tang măt Kuôk hô̆i jăl XVI păng Kơdră tang măt Jơnŭm vei lăng kon pơlei rim kâp kơ yuơ Đại tướng Lương Tam Quang, Kơdră jang lơ̆m hơnih tơm Chinh trĭ, Kơdră chĕp pơgơ̆r Hơnih tơm Kŏng ang pơm Kơdră khul ‘nao đei jơ bơ̆ jang hăm Hơnih pôk rơih pơlei tơm Huế. Đại tướng Lương Tam Quang hôn bơnê kơtang trong iung jang đơ̆ng pơlei tơm Huế lơ̆m bơ̆ jang hơmet ăn pôk rơih. Adoi athei pơlei tơm Huế hơnơ̆ng tơlĕch jang kiơ̆ kơjăp rim nơ̆r pơrô̆ iung jang đơ̆ng Trung ương, mă kăl lăng kơjăp sơđơ̆ng chinh trĭ, sơđơ̆ng dơ̆ng kơjăp tơpôl, sơđơ̆ng kơtơ̆ng ang păng sơđơ̆ng ‘lơ̆ng ăn pôk rơih, ưh kơ lê̆ ưh kơ tom băt dôm tơdrong ou to. “Bơ̆ jang hơmet ăn pơgơ̆r pôk rơih kơ pơlei tơm Huế hlôi tơlĕch jang tôm tong, ‘lơ̆ng, tơtom, iŏk đei jơnei tôch hơ iă. Mă blŭng ‘noh bơ̆ jang chĕp pơgơ̆r, pơrô̆ tơlĕch jang ‘măng pôk rơih hlôi tơlĕch jang đơ̆ng hrôih tôch tĕnh koăng, ƀlep trong pơkăp, ƀlep trong tơlĕch ăn. Hlôi pơgơ̆r jơnei Hop akŏm pơdrơ̆ng dih băl ‘măng mă blŭng găh măt bơngai vă chih hơnăn pơm kơdră tang măt Kuô̆k hô̆i, tang măt Jơnŭm vei lăng kon pơlei rim kâp. Tơdrong hop akom pơdrơ̆ng dih băl ‘măng mă ƀar hlôi đei hơmet ăn tôch hơlen”.

Tơ̆ Dak Lăk, Hơnih bơ̆ jang Pôk rơih jei ‘nao pơgơ̆r jơnei hop akom ‘măng mă 5 akŏm tơlĕch jang dôm tơdrong jang tơm, sơđơ̆ng ƀlep trong tơlĕch ăn păng dôm tơdrong kăl ăn ‘măng pôk rơih Kơdră tang măt Kuôk hô̆i jăl XVI păng Kơdră tang măt Jơnŭm vei lăng kon pơlei rim kâp jăl jang 2026–2031 pơgơ̆r ‘lơ̆ng hơ iă, ƀlep khôi luơ̆t păng sơđơ̆ng.

Kiơ̆ hla bơar chih tơbăt đơ̆ng Hơnih pôk rơih dêh char Dak Lăk, truh dang ei, bơ̆ jang hơmet ăn pôk rơih lơ̆m dêh char hlôi jơnei hơ iă. Hơnih chĕp pơgơ̆r bơ̆ jang pôk rơih dêh char pơgơ̆r hop akom ‘măng mă puăn, pơma tơlĕch dôm nơ̆r pơma pơtôch vă pơrô̆ tơlĕch jang ‘lơ̆ng. Jơnum vei lăng kon pơlei dêh char pơjing 11 khul dăr lăng, iung jang dăr lăng hơlen tơ̆ 102 tơring, phương vă tơtom băt hơdăh tơdrong păng hơmet pơ ‘lơ̆ng tơnap tap tơ̆ tơring.

Sở Nội vụ hlôi pơgơ̆r pơtho pơhrăm tơdrong bơ̆ jang ăn hloh 15.000 ‘nu kơdră tang măt tơ̆ 103 hơnih pơdăh lơ̆m dêh char, akŏm lơ̆m trong pơgơ̆r hop akŏm pơdrơ̆ng nơ̆r, chih hơnăn bơngai tăh hla păng bơ̆ jang jô̆ hơlen kơphĭu. Bơ̆ jang pơdrơ̆ng dih băl đei tơlĕch jang kiơ̆ ƀlep tơchơ̆t, lơ̆m ou Hop akom pơdrơ̆ng dih băl ‘măng mă ƀar kơ dêh char hlôi drơ̆ng mĭnh nơ̆r hăm 22 ‘nu kơdră tang măt Kuô̆k hô̆i păng 144 kơdră tang măt Jơnŭm vei lăng kon pơlei dêh char. Tơ̆ tơring, lơ̆m dêh char sơng iŏk đei hloh 4.600 hô sơ bơngai chih hơnăn ăn pôk tơmơ̆t, đei ƀôh minh ƀar ‘nu chih kơdih hơnăn ăn pôk tơmơ̆t pơm bơngai tang măt kiơ̆ ƀlep tơdrong tơchơ̆t.

Iung pơma tơ̆ hop akŏm, yă Cao Thị Hòa An, Kơdră jang lơ̆m Trung ương Đảng, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Jơnŭm vei lăng kon pơlei dêh char, Kơdră chĕp pơgơ̆r Jơnŭm vei lăng Pôk rơih dêh char Dak Lăk pơma hơdăh, khei năr kơnh rim hơnih kăl akŏm pơgơ̆r ‘lơ̆ng tơdrong iŏk nơ̆r tơgop đơ̆ng bơngai tăh hla hăm dôm bơngai đei hơnăn ăn pôk tơmơ̆t hơrih sa tơ̆ noh, hơmet ăn ‘lơ̆ng ăn Hop akŏm pơdrơ̆ng dih băl ‘măng mă pêng, adoi atŏk kơtang vei lăng sơđơ̆ng dơ̆ng kơjăp, atŏk kơtang pơrô̆ tơbăt păng hơmet keh đang hơnih vă ‘măng pôk rơih đei pơgơ̆r sơđơ̆ng, ƀlep khôi luơ̆t, tơpă jĭ năr lêh tih kơ đĭ đăng kon pơlei.“Mặt trận, rim hơnih jang chinh trĭ-tơpôl akŏm lơ̆m tơdrong pơvih pơvăn ăn kon pơlei sa Têt đei phĭ tơtŏ dơnŏ ‘lơ̆ng, tôm tong, đei hơnŭk hơnoa păng đei hơnih pơchơt pơ hiơ̆ sơđơ̆ng. Kiơ̆ trong pơm păng trŏ lăp kơ Têt joăt joe. Atŭm hăm ‘noh jei pơrô̆ pơrôp, tơroi tơbăt hloi găh tơdrong pôk rơih, vă kon pơlei đei hơnăp jang păng sơnong jang kơ bơngai tăh hla. Inh athei bơ̆n kăl bơ̆ jang ‘lơ̆ng pơrô̆ tơbăt chơt hơ iă Puih mak-chơt hơ iă kơ Đảng-chơt hơ iă kơ Teh đak mă lei jei kăl lăng truh năr lêh tĭh pơđĭ kon pơlei ‘noh pôk rơih”.

Tơ̆ ‘Măng hop akŏm mă 54 kơ Hơnih bơ̆ jang Kuô̆k hô̆i ou ki hlôi lăng hơlen, pơdrơ̆ng kiơ̆ Tơdrong tơchơ̆t hơmet ming ‘măng mă ƀar tơdrong proh hơmet khul bơngai, măt bơngai kơ hơnih jang tơ̆ Trung ương păng tơring hlôi tơƀôh tơbăt bơngai ăn pôk tơmơ̆t pơm kơdră tang măt Kuô̆k hô̆i jăl XVI. Iung pơma tơ̆ hop akom, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh: năr 15/3 gô pơgơ̆r ‘Măng pôk rơih Kơdră tang măt Kuôk hô̆i jăl XVI păng Kơdră tang măt Jơnŭm vei lăng kon pơlei rim kâp jăl jang 2026–2031 . hloh đơ̆ng ‘măng bơ̆ jang dăr lăng tơdrong hơmet ăn pôk rơih tơ̆ Tơring Tơmăn đak kroong Cửu Long ou ki, kiơ̆ đơ̆ng Kơdră chĕp pơgơ̆r Kuô̆k hô̆i, rim tơring pơjao tơdrong jang hơdăh; adoi hôn bơnê kơtang Hơnih bơ̆ jang Trung ương Mặt trận Tổ quốc Việt Nam hlôi pơgơ̆r ‘măng pơdrơ̆ng dih băl tôch jơnei ‘măng mă blŭng, mă ƀar. Lơ̆m khei năr kơnh, Kơdră chĕp pơgơ̆r Kuô̆k hô̆i athei, rim hơnih bơ̆ jang atŏk kơtang hloh dơ̆ng bơ̆ jang dăr lăng hơlen, vă tơtom pơrô̆ iung jang dôm tơdrong đei ƀôh ‘nao; Jơnŭm pôk rơih Teh đak akŏm chĕp pơgơ̆r, pơrô̆ jang kơtang, ‘lơ̆ng hơ iă, kơjăp ‘lơ̆ng. Mă kăl lơ̆m bơ̆ jang pơdrơ̆ng dih băl ‘măng mă pêng truh ou kơnh.