Atŭm hăm tơlĕch jang kiơ̆ trong tơlĕch jang, pơm hơdăh trong jang hle, Khánh Hòa tŏk bŏk pơjing ‘nao rim hơyak pran tŏk muk drăm ‘moi kiơ̆ atŏk tơ iung trong hnam hơnih jang kmăi kmŏk păng ŭnh hơyuh. Dêh char akom hơvơn rim tơdrong vă jang kmăi kmŏk rơgoh ‘lơ̆ng, kmăi kmŏk gơh hơgei, tơklep hăm pơm hrôih khei ‘năr ƀơk ăn hla bơar gơh jang păng pơm hơtŏk bơ̆ jang ‘lơ̆ng pơvih pơvăn ăn bơngai tơmơ̆t jên jang. Tŏk bŏk khei 12 ou ki, Hơnih vei lăng kon pơlei dêh char Khánh Hòa hlôi drơ̆ng nơ̆r trong tơmơ̆t jên jang păng bơngai tơmơ̆t jên jang hăm Tơdrong vă jang tơ iung pơjing ming man, mơdro sa Hơnih jang Kmăi kmŏk pơm tơlĕch tơmam drăm Ninh Diêm 1, găh lơ̆m Hơnih jang Mŭk drăm Vân Phong. Đĭ đăng đơ̆ng pơtrŭt jang truh ƀơk ăn hla bơar drơ̆ng nơ̆r tơmơ̆t jên jang lơ̆m bơ̆ jang lơ̆m mĭnh ƀar khei. Ƀok Trần Minh Chiến, Kơdră chĕp pơgơ̆r Hơnih bơ̆ jang vei lăng Hơnih jang Muk drăm păng rim Hơnih jang Kmăi kmŏk pơm tơlĕch tơmam drăm dêh char Khánh Hòa, tơbăt:“Nhôn hlôi tơlĕch jang kiơ̆ đĭ đăng tơdrong tơchơ̆t đơ̆ng Khul kơdră Teh đak găh trong jang kăl. ‘Moi kiơ̆ ‘noh hlôi hơmet ming đei trong pơkăp teh ăn jang kmăi kmŏk pơm tơlĕch tơmam drăm, hơmet ming proh hơmet drơ̆ng nơ̆r trong tơlĕch jang tơmơ̆t jên jang, drơ̆ng nơ̆r bơngai tơmơ̆t jên jang. Mĭnh ƀar trong jang kăl jang ting ring, tŏk bŏk bơ̆ jang tơdrong ou jei hơmet ăn iung jang đơ̆ng rŏng hloi, mưh đei tôm rơvơn ‘noh pơtruh ăn hô sơ hloi. Lơ loh mă sơđơ̆ng ăn tĕnh koăng hloh”.

Yan ou hơmet pơ ‘lơ̆ng trong bơ̆ jang tơ̆ Khánh Hòa hlôi tĕnh koăng lang să lơ̆m choh jang sa pơm tơlĕch-tĕch mơdro. Công ty TNHH Miboo Vina, hơnih jang kmăi kmŏk duk đak dơsĭ 100% kon jên teh đak đe tơmơ̆t jang, ‘noh tơdrong tơƀôh hơdăh. Tơdrong vă jang Hnam kmăi pơm tơlĕch tơmam drăm tơgŭm ăn bơ̆ jang pơm duk ‘nao tơ̆ Hơnih jang Kmăi kmŏk Ninh Thủy đei hơgăt teh să 12ha, akŏp kon jên tơmơ̆t jang 20 triu USD, đĭ đăng trong pơm hla bơar tơmơ̆t jên jang jei iung jang keh đang tĕnh koăng, jang keh đang koăng hloh 70% jơ ‘năr jang pơtêng hăm tơchơ̆t. Ƀok Nguyễn Văn Trãi, Kơdră chĕp pơgơ̆r Hnam kmăi chơt hơ iă tơbăt:“Kiơ̆ kơ ĭnh băt vă đei mĭnh hla bơar drơ̆ng nơ̆r tơmơ̆t jên jang hmă hmă  kơtĕch 2-3 khei ‘mơ̆i mă đang. Păh hơnih jang hlôi pơtho tơbăt tôch phăl hơlăng, lơ̆m jơ ‘năr tim mă truh 1 giĕng hlôi ƀơk ăn hla bơar drơ̆ng nơ̆r ăn kơ nhôn bơih. Đơ̆ng hơnih jang lăp pơm tơlĕch tơmam drăm, nhôn hlôi yak truh pơm tơlĕch hloi dôm tơdrong kăl nhen hơkou duk.Lơ loh hlôi iung jang vă tôm tom lơ̆m tơdrong jang pơm tơlĕch duch”.

Tơdrong tơlĕch ăn tŏk muk drăm lơ̆m sơnăm kơnh tôch kơ dêh, tơdrong Khánh Hòa lăng kơjăp jang kiơ̆ 3 hơyak pran kơ Trung ương hlôi jing tơdrong kăl hloh. Hăm trong atŏk kơtang ou, rim tơdrong vă jang ŭnh hơyuh tơ̆ Khánh Hòa hlôi tơlĕch jang tĕnh koăng, lăp lơ̆m dang 6 khei ‘noh hlôi tơgoăt pơtruh ŭnh hơyuh lơ̆m tơlei ŭnh hơyuh teh đak. Ƀok Nguyễn Văn Nhựt, Kơdră chĕp pơgơ̆r Hơnih vei lăng Mơdro sa dêh char Khánh Hòa tơbăt, dêh char ‘nao et hơtŏk Hnam kmăi Ŭnh hơyuh jơ̆ng ‘năr Phước Thái 3, pơjing dơ̆ng hơyak pran ăn tŏk mŭk drăm lơ̆m khei năr truh ou kơnh:“Pă đei trong ayơ bơih, ‘meh vă atŏk tơ iung ‘noh ƀơ̆t măt dôm trong hle, tơdrong pran hle ‘noh Khánh Hòa tim mă đei. Pơtih gia nhen Kmăi kmŏk pơm tơlĕch tơmam drăm đei sơkơ̆t hơdăh jĭ tơdrong jang tơm dơnơm hloh, mă lei kmăi kmŏk pơm tơlĕch tơmam drăm kăl đei jơ ‘năr vă rim tơdrong vă jang ‘nao, hơyak pran ‘nao iung jang. Kơ yuơ lơ loh, lăp găh ŭnh hơyuh ‘noh tơm hloh”.

‘Moi kiơ̆ rim hơyak pran ‘lơ̆ng găh trong bơ̆ jang, trong pơm tơlĕch ‘nao păng kmăi kmŏk ŭnh hơyuh, Bí thư Đảng dêh char Khánh Hòa Nghiêm Xuân Thành pơma hơdăh athei tơlĕch jang hloi hrơ̆p minh ‘măng rim trong jang, hơmet pơ ‘lơ̆ng dôm tơdrong tơhlăk tơhlĭn, hơvơn iŏk iung jang jơnei rim khul jang; hơnơ̆ng atŏk kơtang hơmet pơ ‘lơ̆ng bơ̆ jang, pơm hơtŏk jang ‘lơ̆ng pơvih pơvăn ăn kon pơlei, hơnih mơdro sa:“Pơm lơ loh mă pơjing đei lơ tơdrong, bơ̆ jang mă ‘lơ̆ng tơpă.Mưh tơlĕch đei 10 tơdrong jang tơm, 3 tơdrong jang kăl akŏm lơ̆m dôm tơdrong gĭt kăl hloh, đei pơm tơplih hloi tơdrong bơ̆ jang ‘lơ̆ng hơ iă. ‘Moi kiơ̆ rim trong tơlĕch jang đơ̆ng Trung ương nhen atŏk tơ iung khoa hŏk kmăi kmŏk ... Trong tơlĕch jang, Tơdrong tơchơ̆t, tơdrong tơlĕch jang đơ̆ng Đảng dêh char, đĭ đăng dôm tơdrong ou kăl đei bơngai iung jang. Hơnih bơ̆ jang găh tơdrong ayơ ‘noh jang tơdrong mă ‘noh, lơ loh mă jang keh đang dôm tơdrong tơchơ̆t. Păng tơdrong ‘nou kăl đei kơdră kơpal kĭ tơchơ̆t ăn jang, kơdră kơpal dăr lăng hơlen”.