Ƀai đŏk tơbang ah lêh tơbăt ră hơdah, năr 6/1/1946 jĭ minh tơdrong kăp gĭt ang hơdah pơih minh jăl hơtŏk tơ-iung 'nao kơ kon pơlei Việt Nam. Tơdrong đei jơnei kơ 'măng Pôk rơih hlôi sơkơ̆t hơdah tơdrong kơjăp pơgơ̆r kơdih kơ kon pơlei, đơ̆ng hơnih pơm đĭch đam hnam dông iung tơjră iŏk tơdrong rơngei keh kong, pơih pơjing đei Teh đak kơdih po, hăm tôm pơkăp khôi luơ̆t tang măt ăn tôm kon pơlei bơ̆n lơ̆m teh đak păng lơ̆m apŭng plenh teh, păng jing Teh đak rơngei hiôk hian mă blŭng tơ̆ Đông Nam Á. Lơ̆m 80 sơnăm kơ ou, hăm 15 jăl jang, lơ̆m rim tơdrong jang ayơ, Kuô̆k hô̆i adoi đei lơ tơgop kăp gĭt lơ̆m tơdrong jang kăch mạng nuih mơng kơ Đảng, kơ hơdrung hơdrĕch, tơgăl jĭ hơnih jang tang măt kơpal hloh kơ Kon pơlei, hơnih jang dơnơm kơ teh đak păng jing hơnih akŏm kơ̆l 'ngok hơgei kơ tôm kon pơlei.

Pơma ah jơ lêh, Tổng Bí thư Tô Lâm minh 'măng dơ̆ng sơkơ̆t hơdah, đơ̆ng tơdrong kăp gĭt ah sơnăm 1946, Kuô̆k hô̆i Việt Nam hơnơ̆ng vơ̆ pran, sơkơ̆t hơdah hơnih dơ̆ng tơm kơ tơdrong hơrih chinh trĭ - khôi luơ̆t kơ teh đak, jĭ hơnih jang dơnơm lơ̆m tơdrong pơjing păng keh đang  Teh đak pơgơ̆r kơdih xã hội chủ nghĩa Việt Nam. Năng truh tơbăt 100 sơnăm tơ-iung pơjing Đảng (1930 – 2030), 100 sơnăm tơ-iung pơjing teh đak (1945 – 2045) păng vă pơm hơdah tơdrong hơpơi 'meh kơ Việt Nam jing teh đak hơtŏk tơ-iung, pran kơtang sơđơ̆ng jơnap, Tổng Bí thư ră hơdah sơnong jang kơ Kuô̆k hô̆i lơ̆m tơdrong akŏm trong jang hơtŏk tơ-iung kăp gĭt, pơih trong ăn tơplih 'nao, ăn hơtŏk tơ-iung tenh păng sơđơ̆ng teh đak.