Lơ̆m noh, Lêh akŏm Joh ayŏ kaphê lơ̆m kơpal teh đei pơgơ̆r đơ̆ng năr 18/12 truh năr 2/1/2026, hăm hơnih hơdah noh cham char hơlen băt mŭk drăm kaphê lơ̆m kơpal teh, hơnih pơdah  – huch kaphê, tơmam xa păng dôm tơdrong joh ayŏ nhen kơmăng tơdra hơri kaphê – kơphô̆ bri kông, um ai đak kơ-ang Nam Mi, Noel păng sơng sơnăm ‘nao 2026. Ƀok  Nguyễn Văn Lộc – Kơdră Hơnih jang Joh ayŏ, Tơplŏng kơdou păng Tơmang pơhiơ̆ dêh char Lâm Đồng sơkơ̆t hơdah, kaphê ưh hơdrô̆ jĭ mŭk drăm mă oei jing um pơtih ăn joh ayŏ, mŭk tơmam tơguăt hăm jơhnơr hơrih, tơdrong hơrih păng um ai kơ lơ teh đak. Hăm hloh tong hơnê̆ anglŏ sơnăm tơ-iung păng hơtŏk, Lâm Đồng hlôi sơkơ̆t hơdah sơnong kăp gĭt lơ̆m tơdrong jang kaphê Việt Nam, tơguăt hăm pơm jang hơtŏk ‘lơ̆ng, pơm jang tơnăp gơh hơgei păng tơmang lăng kaphê: “Kiơ̆ đơ̆ng cham char hơlen băt, pơdah, akŏm pơma dơnuh gah joh ayŏ păng hŏk hôp apŭng plenh teh, lêh akŏm gô pơjing minh tơdrong hop akŏm pơih să, hơnih mă kaphê Việt Nam đei pơkăp lơ̆m tơdrong jang atŭm kơ mŭk drăm kaphê apŭng plenh teh. Lơ̆m khei năr truh, dêh char Lâm Đồng hơpơi ‘meh lêh akŏm gô jing tơdrong pơkăp akŏm rim sơnăm akŏm ƀenh kơ tơdrong kăp gĭt kơ Lâm Đồng, jĭ hơnih pơkăp kơ rim bơngai băt ‘mêm kơ kaphê lơ̆m jơ̆p apŭng plenh teh”.

Lơ̆m tơdrong akŏm pơgơ̆r Hop akŏm kaphê apŭng plenh teh, dôm tơdrong jang pơdah kiơ̆ trong kơphô̆ păng tơbang Jơnŭm jang hơdoi Kaphê Việt Nam – Apŭng plenh teh, hơvơn lơ kon pơlei păng tơmoi truh, pơih trong hiôk hơtŏk jang hơdoi apŭng plenh teh, hơtŏk tơ-iung kơjăp sơđơ̆ng gah tơdrong jang kaphê păng tơmang pơhiơ̆ joh ayŏ kơ Đà Lạt – Lâm Đồng.

Hăm hơyuh ‘năr tơngiĕt iơ iă kăp gĭt kơ Đà Lạt, tơring tăp dăr Dơnou Xuân Hương kơbông kơbang păng hăt hot hăm Lêh akŏm trong kơphô̆, lơ tơdrong akŏm ang hơdah lơ̆m pơkăp Lêh akŏm chĭng chêng Đông Nam Á sơnăm 2025.

Hăm cham char thoi lĕ hơpo kơ dơnou đak, bri ‘long hơngo păng pơkao chôh kơbông kơbang, tơdra chĭng chêng re ang, hrou atŭm hăm tơdra hơsuang đơ̆ng kơ hrĕng ngê̆ nhơ̆n truh đơ̆ng dôm dêh char: Đăk Lăk, Gia Lai, Quảng Ngãi, Phú Thọ păng dêh char Lâm Đồng. Rim khul, rim hơdrung bơngai pơtruh hăm lêh akŏm trong kơphô̆ minh um ai joh ayŏ phara kơdih, tơgop pơjing um rup ƀenh kơ tơdrong ‘lơ̆ng ăn joh ayŏ chĭng chêng Việt Nam păng tơring Đông Nam Á. Hrou dơh po hăm lêh akŏm, ngê̆ nhơ̆n Trần Ngọc Dũng, bơngai Thái, truh đơ̆ng dêh char Phú Thọ ƀrơ̆k jơhngơ̆m tơroi: “Hăm inh tơring kơ rơbou pơkao Đà Lạt đei minh tơdrong vơch chrih chrai tơpă. Hăp ‘lơ̆ng tơpă, hơyuh ‘năr hlăng ‘lơ̆ng, kon bơngai dơnưp dim. Tơƀơ̆p lơ hơdrung bơngai phara băl jô̆ hloi hơdrung bơngai teh đak đe pơtruh akŏm lơ um ai joh ayŏ phara kơdih. Đon bơnôh kơ kon bơngai noh ưh kơ ‘meh lĕch jăk tơklah hăm tơdrong akŏm ôh”.

Ưh hơdrô̆ jĭ năr akŏm kơ kon pơlei Việt Nam, lêh akŏm trong kơphô̆ oei jing hơnih akŏm joh ayŏ apŭng plenh teh. Ngê̆ nhơ̆n Thong Souphoni, truh đơ̆ng pơlei tơm Viêng Chăn, teh đak Cộng hòa Dân chủ Nhân dân Lào ăn tơbăt, vang truh hăm Lêh akŏm Chĭng chêng Đông Nam Á sơnăm 2025 kơyuơ dêh char Lâm Đồng pơgơ̆r, Khul ngê̆ nhơ̆n đơ̆ng teh đak Kơtriu Rôih pơtruh dôm tơdra chĭng chêng, hơbăn ao hrŭk kră sơ̆ hăm lơ um ai phara kơdih păng Đà Lạt - Lâm Đồng adoi răk ‘măn lơ tơdrong vơch hăm ngê̆ nhơ̆n:  “Rim bơngai joh ayŏ kơ teh đak Lào ‘năr ou hrŭk hơbăn ao Lào, khăn Lào guăng ‘lơ̆ng. Tơ̆ Lâm Đồng lơ hơnih tơmang pơhiơ̆, hơyuh ‘năr rơngơp. Lơ hơdrĕch pơkao ‘lơ̆ng. Tơdrong hơrih kon pơlei hiôk hian păng đei lơ tơmam xa ‘lơ̆ng”.

Lơ̆m pơkăp Lêh akŏm Chĭng chêng Đông Nam Á sơnăm 2025, Lêh akŏm trong kơphô̆ pơgơ̆r tăp dăr Dơnou Xuân Hương - Đà Lạt ưh hơdrô̆ jĭ ‘măng vă pơdah, mă oei jĭ gơng tơroh tơguăt kon pơlei pơla, rim teh đak lơ̆m tơring  kiơ̆ akŏm joh ayŏ chĭng chêng – mŭk drăm kăp gĭt kơ kon bơngai. Dôm tơdra chĭng chêng re ang ah tong hơnê̆ tơring Đà Lạt tŏk bŏk oei pơlan să kơtơ̆ng ang gah tơguăt tơguăl, tơgĭt păng vei răk tơƀăk mong kơjă joh ayŏ juăt jue lơ̆m tơdrong hơrih ‘nao.