Đơ̆ng rŏng vă jê̆ puăt 1 khei hơmet pơ ‘lơ̆ng hiong răm đơ̆ng ‘mi kial hơbŭt, ƀok Lê Văn Trung, 1 ‘nu bơngai jang ka tơ̆ Tuy Hòa, dêh char Đắk Lắk, oei hăt hơmnet ăn ‘măng năm yâu ka mă blŭng kơ pơyan yâu ka Bắc. Ƀok Trung tơroi: “ ‘Măng ‘mi tih đak lơ̆p âu ki, hnam oei đak lơ̆p pơđĭ, ƀato ‘nŏh đom, athei hiong lơ năr hơmet ming ‘mơ̆i. Truh dang ei tơdrong hơmet ming đang bơih, gơ̆h năm rôp yâu ka hơdang tơ̆ đak dơsĭ dơ̆ng bơih. Tŏ ‘mi kial dang ei ‘lơ̆ng, tơdăh năm rôp yâu ka hiôk hian ‘nŏh gô đei lơ ƀiơ̆. Inh hơmĕng ‘măng năm yâu ka âu gô yâu đei lơ, hơnhăk ăn iŏk yoa lơ vă pơm sơđơ̆ng tơdrong arih xa păng sơng xa têt chơt hơiă ƀiơ̆.”

Tŏ ‘mi kial kơnê̆ đei hơnơ̆ng ưh lăp găn trong lơ ‘măng năm rôp yâu ka đĕch mă oei pơm ăn tơdrong hơmet ming ƀato, hnam oei đơ̆ng kon pơlei jang ka tơ̆ găh Hơlĕch dêh char Đắk Lắk roi huach jên, oei jên chă mong măi ‘nŏh nhen ưh pă đei kiơ. Kiơ̆ ƀok Trần Văn Biên, Kơdră vei lăng kon pơlei xăh Tuy An Đông, dêh char Đắk Lắk, tơdrong pơmat tat dêh hlŏh hrei ‘nâu ‘nŏh kon pơlei jang ka ưh kơmăh jên vă hơmet ming ƀato păng pơm sơđơ̆ng tơdrong  arih xa: “Đơ̆ng rŏng kơ ‘mi kial kơsô̆ 13 păng ‘mi tih đak lơ̆p tôch dêh, lơ unh hnam oei pŭ lơ kơsô̆ jên hre vă jê̆ truh năr kla bơih. Khul kơdră tơring oei adrin tơgŭm, atŭm hăm ‘nŏh athei dôm anih mong jên pơdui dơ̆ng khei ‘năr kla hre ăn kon pơlei. Anih mong jên tơgŭm tơpôl oei tơlĕch trong asong ăn dôm unh hnam tŏk iŏk jên, tơlĕch trong tơgŭm mă lăp, păng athei dôm anih jang kơpal pơjing tơdrong ‘lơ̆ng vă kon pơlei gơ̆h tŏk iŏk dơ̆ng, tơjur ƀiơ̆ jên hre, jên kon, tơgŭm ăn kon pơlei jang ka đei tơdrong ‘lơ̆ng vă jang xa, vei kơjăp đak dơsĭ dơ̆ng”.

Mưh dôm ƀato yâu ka gơ̆h năm jang dơ̆ng ‘nŏh nơ̆r athei ưh lăp tơiung ming tơdrong jang xa đĕch mă athei pơm kiơ̆ mă ‘lơ̆ng tơdrong rôp yâu ka kiơ̆ tơdrong hơgăt sơđơ̆ng ‘lơ̆ng, trŏ luơ̆t dơ̆ng. Hăm hơnăp jang tơgŭm ăn kon pơlei năm jang xa dơ̆ng hai, vei lăng tơdrong rôp yâu ka păng tang găn rôp yâu glăi luơ̆t, ưh đei tơroi trong yak păng pơm kiơ̆ tơdrong hơgăt (IUU) hai, tơnŏk ka Đông Tác, dang ei oei vei lăng 515 tŏ ƀato yâu ka găh 2 phường Phú Yên păng Tuy Hòa, lơ̆m noh đei 328 tŏ ƀa to kơjung đơ̆ng 15m tŏk tơ̆ kơpal, đei chô̆ hơmet kơmăy hơlen năng trong yak. Đei lơ ƀato âu chă rôp yâu ka ngư tơ̆ đak dơsĭ, tơdrong jang tơm đơ̆ng kon pơlei rôp yâu ka tơ̆ tơring.

Yoa ƀơm ưh ‘lơ̆ng đơ̆ng lơ ‘măng ‘mi kial sơnăm ‘nâu, ka hơdang đei rôp yâu đei tơ̆ Tơnŏk ka Đông Tác pơhlom lăp dang 3.500 tân, jur lơ pơting hăm kơsô̆ jô̆ păh lăp 4.000 tân kơ dôm sơnăm adrol sơ̆. Mă lei, đơ̆ng ‘năr 16/12, ƀât mă ‘năr roi sơđơ̆ng ‘lơ̆ng, lơ ƀato yâu ka pơtơm năm jang dơ̆ng, mât lơ̆m pơyan yâu ka ‘nao hăm đon hơmĕng gô yâu đei ka hơdang lơ ƀiơ̆ đơ̆ng rŏng kơ hiong răm đơ̆ng ‘mi kial hơbut âu ki. Ƀok Hà Viên, Kơdră vei lăng Tơnŏk ka Đông Tác ăn tơbăt, hơdai hăm pơjing tơdrong ‘lơ̆ng ăn ƀato yâu ka mât lĕch, anih jang oei năng kăl truh tơdrong roi tơbăt, pơtho tơƀôh ăn bơngai jang ka pơm kiơ̆ ‘lơ̆ng dôm tơdrong hơgăt rôp yâu ka hơdang.

“Nhôn hơnơ̆ng krao hơvơn bơngai huơ̆r ƀato, tơ ‘ngla ƀato pơm kiơ̆ ‘lơ̆ng dôm hla ar pơtho đơ̆ng Anih tơm păng Thủ tướng teh đak. Mưh lĕch tơ̆ đak dơsĭ athei pơih kơmăy hơlen năng trong yak, chih răk tôm tơdrong rok trong yâu ka; mưh mât tơ̆ tơnŏk athei nôp hla ar chih tơroi âu vă tơmât lơ̆m kơmăy hơlen năng hăm điên tư. Atŭm hăm ‘nŏh, hơnơ̆ng roi tơbăt vă kon pơlei ưh đei pơm glăi tơ̆ tơring đak dơsĭ teh đak đe, ưh đei rôp yâu ka hơdang păih to đak dơsĭ Việt Nam, lăp yâu lơ̆m tơring đak dơsĭ lơ̆m teh đak trŏ tơdrong hơgăt đơ̆ng luơ̆t đĕch”.

Dêh char Đắk Lắk chih hơdăh tơdrong tơgŭm ăn kon pơlei jang ka tơiung dơ̆ng tơdrong jang xa đơ̆ng rŏng kơ ‘mi kial athei tơmât hơdai hăm đon pơhnŏng jang tŏk anih jang ka pran kơjăp păng tang găn rôp yâu glăi hăm IUU. Ƀok Nguyễn Thiên Văn, Phŏ Kơdră vei lăng kon pơlei dêh char Đắk Lắk ăn tơbăt, kŭm hăm nơ̆r apinh Trung ương đei trong tơgŭm asong tŏk iŏk jên păng tơgŭm vei sơđơ̆ng tơdrong arih xa mă lăp vă kon pơlei jang ka gơ̆h tŏk klăih đơ̆ng pơmat tat, dêh char hlôi athei dôm anih jang kơpal, tơring tơrang tơter đak dơsĭ hơtŏk tơdrong vei lăng ƀato yâu ka, vei kơjăp tơdrong mât lĕch tơ̆ tơnŏk ka, hơlen năng mă ‘lơ̆ng ka hơdang đei rôp yâu, atŭm hăm ‘nŏh sek tơlang tơpăt dôm tơdrong pơm glăi.

“Anih vei lăng kon pơlei dêh char chih hơdăh vă sek tơlang tơpăt hơnăp đơ̆ng bơngai chĕp kơ̆l mưh bơ̆ jang kiơ̆ dôm tơdrong hơgăt ƀơm truh, vă kŭm hăm teh đak pleh hŭt lê̆ the jơk. Tơdăh lê̆ ƀato yâu ka hơnơ̆ng pơm glăi dơ̆ng, ƀơm kơnê̆ truh tơdrong adrin plĕh hŭt the jơ̆k kŭm nhen dôm nơ̆r pơkăp đơ̆ng Việt Nam hăm apŭng plenh teh, năng kiơ̆ tơdrong pơm glăi dang yơ gô đei trong sek tơlang hơnăp jang đơ̆ng khul grŭp kŭm nhen dôm bơngai chĕp kơ̆l."

‘Mi kial pă đei, đak lơ̆p hrơ̆ bơih. Tơ̆ hơnăp jĭ dôm tơdrong pơmat tat, pơlong nol, mă lei hăm tơdrong vang yak hơdoi đơ̆ng khul kơdră tơring, anih jang kơpal păng đon pơhnŏng đơ̆ng kon pơlei jang xa Đắk Lắk, lơ ƀato yâu ka oei hơnơ̆ng lĕch dơ̆ng tơ̆ đak dơsĭ vă jang xa. ‘Nŏh ưh lăp trong jang xa đĕch, mă oei tơƀôh hơdăh hơnăp jang rôp yâu ka hơdang trŏ luơ̆t, vang tơgop kŭm hăm teh đak plĕh lê̆ “the jơk” IUU, năm truh 1 tơdrong jang ka hơdang kơjăp ‘lơ̆ng păng roi đei yoa ƀiơ̆./.