Tơ̆ Hop akŏm, Thủ tướng Phạm Minh Chính tơroi hơdăh: bơ̆jang kiơ̆ hơnăp jang hơtŏk tơiung mŭk drăm tơpôl sơnăm 2025 păng jăl jang 2021-2025 lơ̆m khei ‘năr tơdrong apŭng plĕnh teh tơplih hrĕnh, mơmat tat, lơ tơdrong tam mă byơh đei, ưh kơ tom băt. Tơ̆ lơ̆m teh đak, mŭk drăm tŏk bŏk lơ̆m kơplăh tơplih, athei ‘măn lơ jơhngơ̆m jang, khei ‘năr proh hơmet dơ̆ng teh đak tơ̆ pơđĭ Trung ương păng tơring; tơdrong răm đơ̆ng ‘mi kial hơbŭt, đak lơ̆p pơm hăm hiong răm kơtang ăn pơm tơlĕch tĕch mơdro păng tơdrong hơrih sa Kon pơlei. Mă đơ̆ng thoi noh dôm jơnei gĭt kăl iŏk đei ƀôh hơdăh lơ̆m đĭ đăng rim tơdrong jang. Sơnăm 2025 Việt Nam iŏk đei jang tŏk 8,02%, găh grŭp dôm teh đak jang tŏk lơ kơ tơring, apŭng plĕnh teh, hơdai hăm vei kơjăp sơđơ̆ng mŭk drăm tih, vei lăng hơtŏk kơjă lơ; vei sơđơ̆ng tơdrong hơrih sa tơpôl, tơdrong hơrih sa kon pơlei đei vei lăng ‘lơ̆ng; khŭl lĭnh, vei lăng sơđơ̆ng đei hơmet ming, hơtŏk loi dơ̆ng; jang tơbôl, mơ̆t jang hơdai apŭng plĕnh teh đei tŭn pran; lui ngeh, anih dơ̆ng teh đak hơnơ̆ng đei hơtŏk ‘lơ̆ng.

Jang đang tơdrong hơgăt sut hnam pơgia, hnam hiăh hiok. Man hrơ̆ch 100 tŏ hnam trưng hŏk jăl 1 păng jăl 2 tơ̆ dôm xăh sơlam. Kiơ̆ kơ Liên hợp quốc, kơsô̆ hiôk chơt kơ Việt Nam sơnăm 2025 dơ̆ng mă 46, tŏk 37 kơnao pơting hăm sơnăm 2020. Tơlĕch jang kơtang, đei yua tơdrong proh hơmet, pơm tŏ sĕt bơngai jang kơ Khŭl kơdră teh đak păng pơgơ̆r khŭl kơdră tơring 2 tăl tơklep hăm tŭn pran klăih song kơchư̆k jang, kơchư̆k chĕp kơ̆l pơgơ̆r. Hop akŏm tơlĕch ăn 10 grŭp hơnăp jang, trong jang tơm găh lơ hơtŏk tơiung mŭk drăm - tơpôl sơnăm 2026 păng dôm sơnăm đơ̆ng rŏng dơ̆ng, hơnơ̆ng tơplih ‘nao đon tơchĕng vă tơlĕch jang kơtang, đei yua tơdrong Tơchơ̆t Hop akŏm 14 kơ Đảng, dôm tơdrong bơ̆jang đơ̆ng Khŭl kơdră teh đak.