Tơdrong ưh asong bơngai păng gre vih vơ̆t tơ̆ jăl trong hơ̆ng Prenn truh hơnăp Hơnih tơmang pơhiơ̆ chơkơi đak Đatanla, lơ̆m phương Xuân Hương – Đà Lạt. 'Nou jĭ hơnih hơlih kơtang hloh hăm drơh ta luy lơ̆m 'măng 'mi kial phŭt huơ̆r ah tong hơnê̆ khei 11 sơnăm sơ̆. Tơchơ̆t ưh asong vih vơ̆t gah minh pah trong hơ̆ng Prenn vă akŏm ming hơmet hơnih hơlih ah Km224+650.

Lơ̆m 6 năr, kon pơlei păng gre năm truh hơnih tơm Đà Lạt athei vih vơ̆t rok kiơ̆ jăl trong hơ̆ng Mimosa – Jăl trong 20 dah mă jăl trong hơ̆ng Sacom Tuyền Lâm. Hơdrol kơ noh, dêh char Lâm Đồng hlôi tơbang tơchơ̆t hăt hot gah tơdrong răm hăm jăl trong hơ̆ng Prenn. Kiơ̆ tơlĕch jang, tơdrong hơmet dôm hơnih hơlih tơ̆ trong hơ̆ng Prenn gô keh đang asong gre vih vơ̆t tơ̆ jăl trong ou hơdrol kơ Têt Nguyên đan Bính Ngọ 2026.