Dôm năr ou, tơ̆ lơ chŭn na ƀa đak tơ̆ tơring Tuy An Đông, tơring Hòa Thịnh, phương Phú Yên, gru gra đơ̆ng ‘mi kial đak lip pơrăm oei đei dơ̆k klơ̆p, rơ̆m rĕk tơklăk lơ̆m hơboong thoong đak, lơ jăl hơboong thoong đak hơlih, hư răm. Tơtăm hloh ‘noh hơboong thoong đak tim mă gơh chă pơchoh đak lơ̆m mă khei ‘năr vă rei pơtăm hlôi klui pơtêng hăm pơyan. Yă Trần Thị Rạn, kon pơlei phương Phú Yên tơbăt, kiơ̆ pơyan, tơdrong rei pơtăm hlôi klui hloh rim sơnăm hơdrol, mă lei kơ yuơ ‘mi kial đak lip, đak hơbông hlôi jroh hŭt dăh mă pơm hư răm nhen lĕ vă đĭ đăng dôm tơdrong mong răk kơ kon pơlei choh jang sa, kơna rim bơngai ưh kơbăt vă chă choh jang sa lơ liơ bơih.“Sơnăm ou kơ yuơ ‘mi kial pơrăm ou ki dang ei đei hơdrĕch đơ̆ng yơ vă chă rei pơtăm, đak lơ̆p đĭ đăng, phe jĭ oei răm kơ đak lơ̆p, tơmam yă kiơ jei răm kơ đak lơ̆p ngăl. Dang ei lăp băt gô chang Teh đak chă tơgŭm hơdrĕch ăn kơ bơ̆n jang sa đĕch bơih”.

Ưh khan lăp ưh kơ măh hơdrĕch, lơ tơring tơ̆ chŭn na ƀa đak Tuy Hòa, chŭn na oei huŏng lơm tơdrong “rơhap kơ đak” lăp đơ̆ng rŏng pơyan đak lip hloi. Ƀok Nguyễn Văn Khoa, thôn 4, tơring Tuy An Đông tơbăt, Pơnơ̆t dơnou Tam Giang - dơnou đak tơm pơro ăn tơring - đĭ hơlih, pơm ăn tơdrong choh jang sa nhen lĕ pă gơh.“Tơdrong choh jang sa dang ei ‘noh Dơnou đak Tam Giang hư răm kơtang, rŏ năng kon pơlei pă gơh vă jang chŭn na ƀa đak bơih kơ yuơ ưh kơ đei đak. Lơ̆m tơring đei vă truh 1.000 ha chŭn na ƀa đak đei răm; hơboong thoong đak jei hrơ̆ hroi, ưh kơ đei đak ro. Kon pơlei tôch hơpơi ‘meh vă đei hơmet ming pơnơ̆t dơnou đak vă đei đak tơgŭm ăn choh jang sa. Tơdăh ưh kơ pơm hơmet đei pơnơ̆t dơnou đak lei ưh kơ gơh jang chŭn na ƀa đak ôh”.

‘Măng kial hơbŭt 13 atŭm hăm đak hơbông lip kơtang lơ̆m vă đĭ khei 11 hlôi pơm hiong răm tôch kơtang ăn pơnơ̆t đak, hơboong thoong đak tơm kơ tơring păh Hơlĕch dêh char Dak Lăk. Kiơ̆ đơ̆ng ƀok Nguyễn Văn Chiến, Kơ iĕng kơdră chĕp pơgơ̆r Công ty Pơnơ̆t đak choh jang sa Đồng Cam, pơ đĭ pơnơ̆t đak lơ̆m Đồng Cam păng Pơnơ̆t dơnou Tam Giang đei ƀơm kơnê̆ kơtang, đei ƀơm kơnê̆ hloi dang 19.000ha chŭn na ƀa đak tơring păh Hơlĕch dêh char. Tơ̆ hơnăp tơdrong ou, Công ty hlôi hơvơn kơtang khul jang, iung jang hơdoi hăm rim hơnih jang tĕnh koăng ming hơmet rim hơboong thoong đak, pơnơ̆t đak hư răm.“Truh dang ei, đĭ đăng pơnơ̆t, hơboong thoong đak hư răm hlôi iung jang ming hơmet. Công ty jei nhen Hơnih vei lăng tơmơ̆t jên jang păh Hơlĕch kơ dêh char hlôi hơvơn kơtang khul jang, rim hơnih tơmơ̆t jên jang tơlĕch jang ming hơmet rim hơboong thoong đak găh công ty vei lăng, hrôih keh đang, sơđơ̆ng pơro đak ăn choh jang sa hơdrol năr 31/12”.

Khul kơdră chĕp pơgơ̆r rim tơring tơ̆ Dak Lăk jei tŏk bŏk kơrŭn đĭ ai iung jang. Lơ̆m mă rim tơring tŏk bŏk atŭm hăm kon pơlei chih tơbăt tơdrong hiong răm, iung jang hơmet pơ ‘lơ̆ng rim hơnih teh đak sa, hơlih, dơ̆k lơ̆p ‘noh rim hơnih bơ̆ jang-kih thuơ̆t kơ Hơnih vei lăng Choh jang sa-Cham char dêh char tŏk bok akŏm hơmet pơ ‘lơ̆ng rim Pơnơ̆t đak, dơnou đak hư răm. Găh hơdrĕch ƀa, yă Đặng Thị Thủy, Kơ iĕng Kơdră chĕp pơgơ̆r Hơnih vei lăng Choh jang sa-Cham char dêh char Dak Lăk tơbăt: “Hơdrĕch ƀa vă choh jang sa pơyan Phang ăn kon pơlei hrei ou ‘noh đơ̆ng Hơnih mong răk kơ Teh đak, đơ̆ng rim tơdrong jang tơgŭm djru kơ Teh đak păng đơ̆ng rim Hơnih mơdro sa, bơngai đei jơhngơ̆m đon ‘lơ̆ng tơgŭm ăn kon pơlei. Kơ yuơ lơ loh, kon pơlei sơđơ̆ng jơhngơ̆m jang sa, pă tơtăm găh hơdrĕch vă choh jang sa”.

Rŏ năng vă pơma, đơ̆ng rŏng đak hơbông, đak lip, tơdrong tơnap tap tih hloh kơ chŭn na ƀa đak Tuy Hòa, dêh char Dak Lăk ưh khan lơ̆m tơdrong hiong răm chŭn na, mă kăl ‘noh tơdrong gơlang kơtang lơ̆m tơdrong ming hơmet pơnơ̆t đak, dơnou đak hơboong thoong đak păng găh hơdrĕch ƀa. Tơdrong mă kon pơlei hơpơi dang ei ‘noh hrôih đei đak, đei hơdrĕch chă rei, vă chŭn na ƀa đak Tuy Hòa, dêh char Dak Lăk đei jing ‘lơ̆ng ƀlĭk ƀlăk đơ̆ng rŏng dôm jơ ‘năr ‘mi kial pơrăm kơtang.