Kơtơ̆ng ang tơbăt tơ̆ hop akŏm, trong jang tơruih đak kơtoh, tơruih pruih nhen đak ‘mi tơ̆ Dak Lăk tŏk bŏk tơgŭm ăn pơkom 1/3 găh đak, pơm tơjur kon jên jang, pơm hơtok plei ăl păng ‘lơ̆ng tơmam drăm choh pơtăm. Mă lei, hơgăt teh jang kiơ̆ tim mă iŏk đei vă jê̆ 10% hơgăt teh  ‘long pơtăm, tim mă lang să. Kon jên tơmơ̆t jang ‘măng mă blŭng lơ, kơjă tơmam drăm choh jang sa ưh sơđơ̆ng, atŭm hăm tim mă jang ‘lơ̆ng lơ̆m pơtho tơbăt kih thuơ̆t tŏk bŏk jĭ trong gan ga kơtang. Vă hơmet pơ ‘lơ̆ng tơnap tap, hơnih jang vei lăng pơnơ̆t đal tŏk bŏk hơnơ̆ng iung jang hơdoi hăm rim tơring tơlĕch jang kiơ̆ hloi lơ̆m Tơdrong jang tơm Teh đak, kon jên jang ODA păng ăn tŏk iŏk jên kon jên cheh tŏ sĕt vă tơgŭm ăn tơmơ̆t jên jang ming man hơnih mong đak păng kmăi kmŏk tơruih ‘long pơtăm. Rim nơ̆r tơgop tơ̆ hop akŏm drơ̆ng mĭnh nơ̆r akhan, mưh kon pơlei tơ pă đei kmăi kmŏk, tơruih gơh hơgei, pơkom đak gô jing trong jang kăl hloh ăn hơmet pơ ‘lơ̆ng choh jang sa, lăng truh atŏk tơ iung kơjăp ‘lơ̆ng tơ̆ rim tơring teh groi phang pơđang.