Lơ̆m dôm ‘măng ‘mi hngach hơtuch pơyan păng ‘năr hngôm, 2 kơmăy sơ̆k kŏng suơ̆t 40 tấn 1 ‘măng kơ Hơnih răt iŏk tơmam đơ̆ng choh jang sa đei Hạnh Phúc tơ̆ xăh Ea Knuếch, dêh char Đắk Lắk bơ̆jang tôch ai. Hơyuh đak kiơ̆ đing pơchoh păr tŏk bŏk ‘năr ‘mi, hơdai hăm re mô tơ kơdâu hơnơ̆ng. Ƀok Châu Phúc, tơ ‘ngla hơnih jang, tơbăt ŭnh hnam sư tơmơ̆t jên jang 300 triệu hlak jên tăh kơmăy sơ̆k âu đơ̆ng sơnăm 2021, păng hlôi hơtŏk iŏk yua tôm tong:

“Kơmăy sơ̆k hrei ‘nâu đĭ tơ jur tôch kơ lơ ‘nhui, ‘mui păng hrơ̆ng, ưh pă ƀơm ưh kơ ‘lơ̆ng truh kon pơlei jum dăr yua kơ hơyuh đak đei hơtŏk tơ̆ kơpal kơjung. Kơmăy sơ̆k đei yua 2 trong: mĭnh trong đơ̆ng hơla tơ̆ kơpal, mĭnh trong đơ̆ng kơpal jur, tơgŭm cheh phe hrĕng hơtŏ, ưh kơ kăl hơvơ̆r hăm ti nhen hơdrol. Trong kơdâu yua điên vă soh kơđoh pơm hơyuh tŏ, đơ̆ng rŏng ‘noh kơmăy mô-tơ kuat điện tơhlu păng tơhlu hơtŏ hơyuh tŏ lơ̆m kơmăy sơ̆k, tơgŭm cheh phe hrĕng dang ăi lơ̆m kơplăh sơ̆k”.

Ƀok Huỳnh Đình Cường, kon pơlei pơtăm cheh phe tơ̆ plei Tân Thành, xăh Ea Knuếch, tơbăt ŭnh hnam đei 1 hek tar cheh phe, mĭnh sơnăm iŏk dang 15 tấn hơdrih. Hơdrol ki, cheh phe găh lơ đei sơ̆k tơ̆ cham hnam. Mă lei 4 sơnăm kơ âu, cheh phe phĕ truh dang yơ sư chơ tơpăt truh kơmăy sơ̆k. Jên sơ̆k dang 700.000 hlak jên 1 tấn hơdrih mă lei oei đei yua hloh lơ pơting hăm tơdrong sơ̆k tơ̆ cham tơƀơ̆p ‘mi, kơsô̆ găr găm, phơ̆k tŏk lơ, đei hơnih răt iŏk pơm pơ gơ̆:

“Dôm sơnăm kơ âu iŏk yua kơmăy sơ̆k, ĭnh ƀôh cheh phe kŭm ‘lơ̆ng, ưh kơ pha kiơ sơ̆k tŏ thoi sơ̆. Sơ̆k ‘noh athei tơƀơ̆p ‘năr tŏ, oei ‘mi ‘noh pă bơih. Lơ̆m kơplăh ‘noh, sơ̆k hăm kơmăy hiôk hloh mưh ‘mi đunh năr, cheh phe găr hrĕng dang ăi, ưh kơ đei phơ̆k, tơ jur kơsô̆ hiong”.

Kiơ̆ kơ ƀok Nguyễn Tiến Dũng, Phŏ Kơdră dơnơm vei lăng Kŏng ti tĕch tơlĕch tơ̆ teh đak đe 2-9 Đắk Lắk, anih mơdro sa tŏk bŏk jang hơdai hăm hloh 80.000 ŭnh hnam lơ̆m tơring pơtăm cheyh phe, tơdrong tơplih đơ̆ng sơ̆k tơ̆ cham jing sơ̆k tơ̆ kơmăy đei yua rơđăh, vei sơđơ̆ng ‘lơ̆ng păng tơdrong hơtŏ đơ̆ng cheh phe găr tĕch tơ̆ teh đak đe. Ƀok Dũng akhan, tơdăh tơdrong tơmơ̆t jên jang răt kơmăy sơ̆k đei pơgơ̆r hrơ̆ch hăm tơdrong pơjing tơ̆ dôm tơring tơmam păng đei trong jang tơgŭm tơmơ̆t jên jang trŏ lăp, ‘noh gô hơtŏk iŏk yua tôm tơdrong hloh:

“Bơ̆n kăl kơ pơjing dôm hơnih sơ̆k cheh phe akŏm, păng đei trong jang tơgŭm kơmăy kơdâu trŏ lăp vă tơgŭm kon pơlei ‘noh jĭ tôch kơ gĭt kăl. Tơ̆ âu, kon pơlei gơh tĕch kơtă, kĭ gơih dăh mă pơma dơnuh găh tơmam. Kiơ̆ đơ̆ng noh pơm đei cheh phe găr hơtŏ, ‘lơ̆ng hloh, pơm lăp hăm ‘meh vă tĕch tơ̆ teh đak đe roi ‘năr roi tôch hơlen”.

Yă Đặng Thị Thuỷ, Phŏ Kơdră Anih vei lăng găh Choh jang sa păng Cham char dêh char Đắk Lắk tơbăt, mă đơ̆ng pơyan jang cheh phe sơnăm ‘nâu đei ƀlep lơ̆m khei ‘năr ‘mi lơ, kial hơbŭt, ‘mi tih... mă lei dôm tơring cheh phe tơ̆ dêh char oei vei sơđơ̆ng phĕ đum 85%. Dôm hơnih sơ̆k tơ̆ dôm tơring hlôi tơgop vei sơđơ̆ng, tang găn tôch ai hiong lơ đơ̆ng rŏng phĕ. Anih vei lăng choh jang sa tŏk bŏk hơdrin tơgŭm bơngai pơtăm pơm dôm hơnih sơ̆k akŏm, ‘nao tơ̆ dôm tơring cheh phe tơm:

“Nhôn hơtŏk tơlĕch jang dôm tơdrong jang kiơ̆ tơdrong Tơchơ̆t 98 vă tơgŭm kon pơlei, anih mơdro sa păng hơp tak xăh tơmơ̆t jên jang anih jang tơmam drăm pơyua ăn jang hơdai, đơ̆ng noh hơtŏk ‘lơ̆ng tơdrong jang pơm tơlĕch cheh phe ăn bơngai pơtăm. Hrei ‘nâu, lơ kơmăy sơ̆k ‘nao hlôi păng tŏk bŏk tơmơ̆t yua, tơlĕch jang jơ̆p jang, tơgop vei sơđơ̆ng găr cheh phe đei sơ̆k hơtŏ, ‘lơ̆ng păng pơm lăp tôm tơdrong hơgăt tĕch lơ̆m teh đak kŭm nhen tĕch tơ̆ teh đak đe.”

Mă đơ̆ng jên tơmơ̆t jang blŭng a kŭm lơ, mă lei hơnih sơ̆k cheh phe kơmăy kơmŏk ‘nao tŏk bŏk hơtŏk đei yua rơđăh rơđong, mă loi ‘noh jĭ lơ̆m ‘năr ‘mi lơ, tŏ ưh kơ sơđơ̆ng nhen hrei ‘nâu. Păng ‘nâu jing tơdrong ‘lơ̆ng pran kơtang hloh, pơtrŭt rim ŭnh hnam jang chŭn mir, anih mơdro sa hơnơ̆ng tơmơ̆t jên jang. Kiơ̆ đơ̆ng noh, anih jang găh cheh phe Đắk Lắk gô tơ jur ƀiơ̆ kơsô̆ hiong, hơtŏk ‘lơ̆ng, iŏk đei dôm tơdrong hơgăt găh pơđĭ kơjă, hơnăn păng kơjăp ‘lơ̆ng.