Sơnăm 2022, ‘nhŏng Nguyễn Thanh Đức tơ̆ xăh Sông Lũy, dêh char Lâm Đồng, pơtơm rong ler hơdai hăm rong sem văt vă tĕch pơm ‘nhĕm. ‘Nhŏng tơroi: trong jang ‘nâu tơgĕch iŏk tơdrong ‘lơ̆ng găh teh đơ̆ng unh hnam, tĕch ăn lơ bơngai ‘mĕh răt păng vang tơgop pơm tơplih ‘long pơtăm, kon tơrong hơnhăk ba iŏk yoa lơ...

Iung jang xa kiơ̆ trong rong ler, khei ‘năr blŭng a ‘nhŏng Đức tam gan băt trong rong kơna kŭm tơƀâp lơ pơmat tat. Mă lei ƀôh lơ bơngai ‘mĕh răt ler, tơmam rong đei ưh kơmăh vă tĕch kơna ‘nhŏng răt dơ̆ng tơmam, hŏk ki thuơ̆t, trong rong păng chă yŏng kơdih, tĕch mơdro tơ̆ ‘ngoăih roi lơ ƀiơ̆.

‘Nhŏng Đức ăn tơbăt, jên jang blŭng a vă rong 1 hơdrŭng ler 2m2 dang 300.000 hlak (đei không pơsei, ƀao kak cao su vă pơm hơdrŭng păng kơtăp ler). 1 hơdrŭng ler đơ̆ng rŏng dang 35 năr rong gơ̆h tĕch bơih. Tơmam hiĕm jĭ kơloăi tơmam xa hiĕm ăn sem văt, gơ̆h hiĕm ler xa bơ̆n ‘nhot hla noăn, hla ƀum yoăn, tơ ‘mơ̆ng ƀum ƀlang, ‘ngiĕt… 1 năr hiĕm ler xa 2 vât (til pơgê păng tơ̆ kơsơ̆). Ler đei rong hmă, rơgŏh ‘lơ̆ng, ưh đei jĭ, hiong huach lăp tŏ sĕt đĕch. Vă ler ƀônh tih, hơdrŭng ler athei hrĕng ‘lơ̆ng, rơhơi, rơngơp, ưh đei hơ ‘yuih yoa pơm hăm hla prit kro dăh mă hmok kơtăp iĕr...

‘Nhŏng Nguyễn Thanh Đức tơroi: “Đơ̆ng rŏng kơ jĭ Covid-19 oh vih tơ̆ pơlei ưh pă đei năm tơ̆ Sài Gòn dơ̆ng, ƀôh đei hơdrŭng rong ler tơ̆ hnam đơ̆ng adrol ki bơih, oh tơlĕch jên pơm dơ̆ng hơdrong rong sem văt, vă iŏk ich văt tưh ăn ‘nhot, iŏk ‘nhot pơm tơmam hiĕm ler păng sem văt dơ̆ng."

Mưh trong jang rong ler đei xa, ‘nhŏng Đức tơlĕch jên pơm dơ̆ng hơdrong rong sem văt. ‘Nhŏng Đức tơroi, rong văt athei pơm hơdrong rong mă rơgŏh, rơhơi ‘lơ̆ng, ưh đei hơmơ̆l, hơuh vă huei đei jĭ. Tơdrong hiĕm sem athei hiĕm hơnơ̆ng păng trŏ jơ, tơdăh ưh sư ƀơm ưh ‘lơ̆ng truh khei ‘năr cheh kơtăp. Đơ̆ng ‘nao cheh truh sem đei kơtăp lăp dang 50 năr păng sem cheh tăp đơ̆ng 7 - 8 khei, đang kơ ‘nŏh athei tơplih yŏng ‘nao dơ̆ng.

Tơplih ăn tơdrong hiĕm hăm đơ̆k yoa đơ̆ng hnam kơmăy pơm, ‘nhŏng tơgĕch rong ler păng pơtăm ‘nhot vă pơm tơmam hiĕm sem. Sem văt ‘nhŏng rong tĕch tơ ‘ngoăih dang 12.000 hlak 1 pôm lơ ƀiơ̆ đe rong hăm kơmăy tĕch 8.000 hlak 1 pôm. ‘Nhŏng Nguyễn Thanh Đức tơroi: “Vă rong văt tĕch pơm ‘nhiĕm đei yoa lơ, ‘nŏh inh rong hơchăng, hiĕm hrâu dôm tơmam nhen ‘nhot, ƀum, plei… vă gơ̆h đei ‘nhĕm ‘lơ̆ng; đang kơ ‘noh hiĕm dơ̆ng bơ̆n lep lar, oei hnam nhôn ‘nŏh đei ler bơih, hiĕm thim vă sem ƀônh tih, đei ‘nhĕm ‘lơ̆ng. Kơna ‘nhĕm sem văt tơ̆ âu pha ƀiơ̆ kơ ‘nhĕm văt đe rong lơ̆m hơdrao, rong hăm kơmăy.”

Trong jang đơ̆ng ‘nhŏng Nguyễn Thanh Đức hơnhăk ba iŏk yoa sơđơ̆ng, păng oei dar dĕh pơih xă tơ̆ xăh Sông Luỹ, dêh char Lâm Đồng. ‘Nhŏng Nguyễn Mạnh Tường Huy, Bí thư Đoàn xăh Sông Lũy, ăn tơbăt, ‘ngoăih kơ pơlung druh dăm jang tŏk, pơih xă trong rong sem văt, tơ̆ hơnăp kơnh, tơring vă hơnơ̆ng tơlĕch lơ trong jang ‘nao, đei yoa ăn druh dăm păng kon pơlei jang chŭn mir:

“Trong jang ‘nâu hlôi jang đei 2 sơnăm, Đức iŏk yŏng đơ̆ng tơring nai vih. Đang kơ ‘nŏh rong tĕch pơm ‘nhĕm păng rong yŏng hai, chă pơtăm hloi ‘nhot vă tĕch mơdro. Rim tơmam jang đei tĕch online ngăl. ‘Nâu jĭ trong jang ‘nao, tơdrong athei jang kiơ̆ ki thuơ̆t kŭm nhen trong vei rong kŭm tôch hơlen. ‘Nâu jĭ trong jang blŭng a, lơ̆m khei ‘năr truh vă pơlung, pơih xă trong jang ‘nâu vă tơgŭm ăn đe bôl boăl đoàn viên, druh dăm đei đon ‘mĕh jang xa kơdih, gơh đei trong jang tŏk, pơm pơdrŏng tôch tơgăl.”

Rong ler hơdai hăm rong sem văt tôch ƀônh, ưh kăl lơ jên jang dơ̆ng, tôch lăp hăm đe druh dăm tơ̆ tơring tơrang. ‘Nhŏng Nguyễn Thanh Đức tơ̆ xăh Sông Luỹ, dêh char Lâm Đồng ling lang ‘mĕh roi tơƀôh ki thuơ̆t jang kŭm nhen tĕch yŏng ăn dôm bơngai ‘mĕh iung jang xa hăm tơdrong jang hlĭch âu./.