Ea Knir Farm oei ah thôn Hòa Thành, xah Ea Knuec, dêh char Đăk Lăk, hơtaih đơ̆ng hơnih tơm Buôn Ma Thuột pơhlom mơjĭt km. 'Nou jĭ hơnih mă tơmoi tơchă truh vă hrou dơh po hăm tơdrong hơrih mir pơgar. Lơ̆m noh, tơmoi lŭ lăp hăm tơdrong hơlen pơhrăm bŭch pơmou ja păng sa chăo iĕr pai hơdoi hăm pơmou ja. Pơmai Êban Thái Ân, bơngai Bahnar, tơ-'ngla pơgar Ea Knir Farm, ăn tơbăt: pơmau ja đei lăng nhen lĕ “mah kok” kơ bri kông: chăt kơdih kiơ̆ pơyan, ƀou phu 'lơ̆ng, rơchăm 'ngam – minh tơdrong 'lơ̆ng mă ưh đei hơdrĕch pơmou ayơ gơh pơtăl: “Pơmou ja jĭ tơmam pôk asong đơ̆ng teh. Nhôn ưh đei tơkan lơ, mă pơm thoi yơ vă kơ hăp gơh le lăi hăm cham char kơdih. Rim 'măng ah pơyan pơmou chăt, tơmoi truh pĕ pơmou lŭ lăp, kơlih hăp rơgoh 'lơng, akŏm ƀenh tơdrong hlăng kơ bri kông”.

Chăo iĕr pơmou ja tơ̆ Ea Knir Farm đei pai kiơ̆ trong pai xa kơ kon pơlei tơ̆ tơring: ƀônh ƀŏ mă lei athei kơchăng hăm rim tơmam drăm. Phe pai chăo noh phe ƀa mir dah mă ƀa chơke tơring groi kông -  hơdrĕch phe pui, rơmuơn păng ƀou phu.

Tơdrong mă pơm ăn chăo iĕr pơmou ja tơ̆ Ea Knir Farm jing kăp gĭt ưh hơdrô̆ gah tơdrong ƀou phu mă oei jing tơdrong pai pơjing tơmam xa noh. Tơ̆ farm, tơmoi vang jang pai pơjing hloi tơmam xa ou đơ̆ng tơmam pai xa truh chăo pai pơjing đei nhen kơdih năm bŭch pơmou ja chăt lơ̆m mir pơgar păng vang pai pơjing hloi. Tơmoi đei pơhrăm hơlen băt gah pơmou ja, pơhrăm gah bŭch pơmou vă mong ăn pơmou chăt hơlơ̆k dơ̆ng. 'Nhŏng Nguyễn Trọng Minh, tơmoi đơ̆ng pơlei tơm HCM ăn tơbăt: “ 'Nou jĭ 'măng mă blŭng inh kơdih bŭch pơmou ja. Ah mă dui tơm pơmou, oei ƀou hơyuh teh hơ-iuch păng lăng pơmou kok chăt pơcher dih băl, 'noh lăp kơ măt dêh. Kơdih rô̆ pơmou đơ̆ng rŏng kơ noh đei xa kơdih tơmam mă po pai pơjing  – hơ-iă tơpă mơ̆n. Inh gô vih hơlơ̆k tơ̆ ou, vă tơ oei drang tŏ ah pơgê hrôih dah mă drơ̆m kơsơ̆, xa minh mơnhan chăo iĕr pơmou ja tŏ hiu păng mơ̆ng nơ̆r khul iĕr krao băl tơ̆ jơ̆ng groi đĕch adoi tơgăl lăp kơ đon bơih”

Adoi nhen rim hơnih pơdơh pơdei nai, Ea Knir Farm asong tơmoi dơ̆ng lăng ah jih tơnuh unh, mơ̆ng tơroi gah trong pai chăo, trong rơih iĕr, tah ƀoh ƀôk ngok ou to kiơ̆ trong juăt jue kơ tơring Tây Nguyên. Pơmai Hồng Anh, tơmoi truh đơ̆ng Vũng Tàu tơroi: “Inh lăp hloh noh đei tơ oei ah tơnuh unh, ƀou phu hơyuh iĕr păng pơmou lŭk lơ̆k atŭm. Hơyuh plenh hlăng 'lơ̆ng, kial tơhlu rơngơp, kơdih inh ƀôh thoi lĕ tŏk bŏk oei hơrih lơ̆m minh tơring pơlei pơla sơnêp 'lơ̆ng, ưh kơsĭ chă năm tơmang pơhiơ̆ ôh”

Chăo iĕr pơmou ja đei tah lơ̆m mơnhan lơ̆n hmă. 'Nhui tơpăr hơyuh ƀou phu kơ iĕr rong pơjing hê̆ hơyuh ƀou phu kăp gĭt kơ tơmam xa tơring Tây Nguyên. Minh 'nu tơmoi truh đơ̆ng Đà Nẵng, pơmai Nguyễn Thị Yến akhan: “Inh xa lơ chăo iĕr bơih, mă lei chăo iĕr pơmou ja tơ̆ ou hăp pha: 'ngam, hlăng hơdjă, ưh đei rơmă, adoi ưh đei ƀou kơdraih ôh. Cham char noh rŏ tơmam xa 'lơ̆ng, noh 'meh oei lơ năr atăm dơ̆ng”

Hơlen băt gah joh ayŏ - tơmam xa hăm chăo iĕr pơmou ja hlôi jing minh gru grua kăp gĭt kơdih kơ Ea Knir Farm. 'Nou ưh hơdrô̆ jĭ tơmam xa bek 'lơ̆ng, mă hăp oei jing minh tơmam pơ-'lơ̆ng “đon bơnôh” akŏm ƀenh tơring teh păng đon bơnôh kon bơngai: tơguăt tơjê̆, tơpăt jue păng ƀenh kơ tơdrong tơnŏ akŏm đei đơ̆ng tơring teh.