Kiơ̆ tơlĕch jang, 9 tŏ rông joh ayŏ đei asong pơtăm hăm kơsô̆ jên pơkăp 20 tih hlj. Rim rông să pơhlom 130m², kơjung hloh  17m. Rim tŏ rông pơm kiơ̆ um rông so, trŏ hăm joh ayŏ kon pơlei kon kông tơ̆ tơring sơlam Gia Lai păng Quảng Ngãi. Kơchĕng, tôm 9 tŏ rông gô keh đang păng et hơtŏk lơ̆m khei 9/2026.

Pơma ah lêh pơtơm, Thượng tướng Trương Thiên Tô, kơdă Hơnih tơm Chinh trĭ Khul linh Kon pơlei Việt Nam  ăn tơbăt: tơdrong asong pơm rông joh ayŏ tơ̆ dôm xah sơlam teh Tây Nguyên tơƀôh tơdrong tơgŭm đơ̆ng Đảng, Teh đak păng Khul linh hăm kon pơlei kon kông, vă hơmet 'lơ̆ng tơdrong tơguăt tơguăl tôm kon pơlei, pơjing kơjăp “đon lui lơ̆m kon pơlei”, tơguăt hăm sơnong jang vei sơđơ̆ng chinh trĭ, vei sơđơ̆ng tơpôl lơ̆m tơring hơrih xa. Thượng tướng Trương Thiên Tô pơtruh nơ̆r: “Khei năr truh, rim hơnih jang, rim tơring jang atŭm kơjăp, akŏm pơm jang vă dôm tơdrong tơlĕch jang keh đang trŏ khei năr pơkăp, iŏk yua trŏ tơdrong kăl hơnih akŏm joh ayŏ kơ kon pơlei pơla; pơgơ̆r jang trŏ tơchơ̆t tơlĕch, vei sơđơ̆ng tơdrong 'lơ̆ng jing tơdrong kăl hloh păng vei sơđơ̆ng 'lơ̆ng, ưh đei kơdou kiơ̆ tơdrong pơkăp jang mă lăng pơhơi gah tơdrong 'lơ̆ng lơ̆m pơm jang”.

Lơ̆m tơdrong hơrih joh ayŏ Tây Nguyên, rông jĭ hơnih akŏm kơ pơlei pơla, hơnih pơgơ̆r dôm tơdrong et xa, hŏk hôp păng sek tơlang kiơ̆ khôi juăt pơlei pơla. Mă lei, tơ̆ lơ xah sơlam teh, rông hlôi hư răm dah mă tam mă đei pơm drơ̆ng băl, tam mă asong mah ăn tơdrong kăl akŏm joh ayŏ kơ kon pơlei. Tơdrong mă dôm hơnih linh kơ Hơnih tơm vei lăng khul linh pơm ăn 9 tŏ rông joh ayŏ gô pơm trong hiôk vă kon pơlei tơ̆ tơring sơlam teh gah Tu Tây Nguyên chă akŏm hŏk hôp, pơgơ̆r et xa lơ̆m hơnih kơjăp 'lơ̆ng hloh. Tang măt ăn Hơnih jang Đảng, Hơnih tơm linh Binh đoàn 15, Thiếu tướng Hoàng Văn Sỹ - Kơdră linh Binh đoàn sơkơ̆t hơdah: “ 'Nou ưh hơdrô̆ tơdrong jang 'măn ăn tơdrong akŏm atŭm kơ pơlei pơla mă oei tơƀôh sơnong jang hơdah, đunh khei năr kơ khul linh lơ̆m tơdrong yak hơdoi hăm kon pơlei. Kiơ̆ đơ̆ng noh kơhret tơdrong tơguăt tơguăl đơ̆ng kan ƀô̆ linh hăm kon pơlei kon kông. Binh đoàn 15 pơkăp gô jang hơdoi kăp gĭt hăm rim khul jang păng jơnŭm pơgơ̆r tơring vă pơm jang đei jơnei dôm sơnong jang, hơdrol hloh noh pơm 9 tŏ rông kơjăp 'lơ̆ng, trŏ hăm tơchơ̆t tơlĕch jang”.