Pôk pơ ư, tơchĕng ‘lơ̆ng dôm tơdrong adrin tôch pơneh păng dôm tơdrong tơgop tôch gĭt kăl đơ̆ng Anih mong jên hăm tơdrong jang tŏk mŭk drăm, tơpôl kơ teh đak sơnăm 2025, Thủ tướng pơma truh dôm nơ̆r tôch gĭt kăl ‘nŏh "Roi tơƀôh trŏ ƀlep – Khul jang tŏ sĕt bơngai – Trong pơgơ̆r jang roi ‘lơ̆ng - Thu mong, tơlĕch jên jang đei rơkăh – Anih tech mơdro tơplih ‘nao – Trong jang mŭk drăm lơ̆m teh đak sơđơ̆ng ‘lơ̆ng – Kon pơlei hiôk chơt – Teh đak tŏk pơdrŏng". Sơnăm 2026, Thủ tướng pơjao ăn Anih jang jên hu tơlĕch jang kiơ̆ trong: "Hơpơi ‘mĕh pơdrŏng kơtang - Trong pơgơ̆r jang rơgei, đei yoa - jang hăm kơmăy sô̆ - Thu mong, tơlĕch jên jang sơđơ̆ng ‘lơ̆ng”.

Thủ tướng athei Anih jang jên hu năm hơdrol găh tơdrong tơplih ‘nao đon tơchĕng, tơplih ming đon pơcheh jang tok; roi tơƀôh trong jang jên hu lơ̆m teh đak trŏ hăm dôm tơdrong tơm, tơdrong kăl; vang yak hơdoi, tơgŭm ăn 2,3 triu unh hnam tĕch mơdro tơplih ming trong jang đei yoa hlŏh, năng ‘nâu jĭ tơdrong tơm a vă đe sư gơ̆h jang tŏk jing anih tĕch mơdro kiơ̆ tơdrong Tơchơ̆t 68. Thủ tướng lui, Anih jang jên hu gô hơnơ̆ng tưk tơiung hơnăp jang tơm, jang đang ‘lơ̆ng tơdrong jang sơnăm 2026, mong akŏm jên hu, tơmam drăm vă pơm ăn dôm tơdrong hơpơi ‘mĕh jing đei tơpă, pơjing trong yak kơjăp ‘lơ̆ng vang tơgop hơnhăk teh đak bơ̆n yak mât lơ̆m chăl jang tŏk pran.