Roi tơbăt đơ̆ng Anih jang Nội vụ dêh char Lâm Đồng ăn ƀôh, truh ‘năr 6/1, anih jang hlôi iŏk đei roi tơbăt tơdrong jên khei, hơpăh sa Têt đơ̆ng 229 anih mơdro sa, anih jang iŏk yua bơngai jang tŏk bŏk bơ̆jang lơ̆m dêh char, hăm akŏm kơsô̆ hloh 19.800 ‘nu jang. Lăng atŭm, dôm anih mơdro sa hlôi bơ̆jang tôm dôm tơdrong hơgăt đơ̆ng khôi luơ̆t găh jên khei, jên hơpăh ăn bơngai jang.

Hăm hơpăh sa Tết Nguyên đán Bính Ngọ 2026, dang ei đei 116 lơ̆m 229 anih mơdro sa roi tơbăt đei hơpăh ăn bơngai jang. Lơ̆m noh, grŭp mơdro sa kơdih hơnơ̆ng pơm ăn tơdrong hơiă ƀơ̆t đei 1 anih mơdro sa hơpăh 180 triệu hlak jên 1 ‘nu, kơsô̆ lơ hloh lơ̆m dêh char. Mă lei kŭm đei anih mơdro sa lơ̆m grŭp âu hơpăh têt tôch kơ tŏ sĕt, lăp 200.000 hlak jên 1 ‘nu.